Свечку ў вакне заўважылі 12 лістапада, суд быў 10 снежня, але толькі ў пачатку студзеня мужчына атрымаў пастанову суду, якой падзяліўся з «Белсатам».
Паводле міліцэйскага пратаколу, мужчына вечарам 12 лістапада «з мэтай публічнага выражэння сваіх грамадска-палітычных інтарэсаў правёў масавае мерапрыемства – пікетаванне, на правядзенне якога не быў атрыманы дазвол Менгарвыканкаму, шляхам размяшчэння на лоджыі запаленай свечкі для дэманстрацыі грамадзянам».
Мужчына не прызнаў сваёй віны і растлумачыў, што не праводзіў «масавага мерапрыемства». Аднак суд паверыў сведку-міліцыянту ў балаклаве, які выступаў праз відэасувязь.
Ператрус у мужчыны не праводзілі. Доказам «несанкцыянаванага мерапрыемства» было фота, якое сілавікі зрабілі на тэлефон.
Для «Белсата» мужчына зрабіў падобнае фота: дзясяткі вокнаў высотнага жылога дома, у палове якіх запаленае святло. У адным з такіх вокнаў на другім дзясятку паверхаў сілавікі разглядзелі «свечку-пікет», хоць з такой вышыні цяжка разабраць, што ў вакне з’яўляецца крыніцай святла.
Суд не знайшоў абцяжарвальных абставінаў, «улічыў характар і ступень грамадскай шкоднасці» і тое, што падсудны гадуе малалетняе дзіця.
Вынік – штраф у 1450 рублёў (50 базавых велічыняў (палова ад максімальна магчымага паводле арт. 24.23 КаАП РБ). Абскарджваць штраф мужчына не збіраўся: «у РУУС далі зразумець, што шанцаў практычна няма, магу толькі пагоршыць стан».
З падобнай прычыны, за свечку ў вакне ў гадавіну забойства Рамана Бандарэнкі, у снежні пакаралі 5-дзённым арыштам супрацоўніцу Акадэміі навук. Ейнаму мужу патлумачылі, што тады сілавікі «ездзілі і фоткалі ўсе вокны са свечкамі».
АА belsat.eu
