У Чэлябінску спрабуюць мабілізаваць грамадзяніна Беларусі? Пасольства Беларусі цвердзіць, што гэта фэйк
У Чэлябінску спрабуюць мабілізаваць грамадзяніна Беларусі Аляксандра Арлукевіча і нават пагражаюць прымусовай дастаўкай. Аб гэтым паведамляе расейскі праваабаронца Павел Чыкаў у сваім тэлеграм-канале. Тым часам мясцовыя ўлады адмаўляюць дакладнасць інфармацыі аб мабілізацыі іншаземца.
Паводле праваабаронцы, Аляксандр Арлукевіч сам звярнуўся да юрыстаў за дапамогай і даслаў адпаведныя дакументы. Арлукевіч паведаміў, што працуе на цукровым заводзе Чэлябінску, ён – грамадзянін Беларусі, грамадзянінам Расеі ніколі не быў, не мае і віду на жыхарства. У якасці пацверджання гэтай інфармацыі мужчына даслаў фота пашпарта і позвы, якой яго паклікалі ў ваенны камісарыят у Чэлябінску «у адпаведнасці з указам аб частковай мабілізацыі» для адпраўкі на зборны пункт. Пры гэтым у позве прама пазначана, што Арлукевіч – грамадзянін РБ, і што ён датычыць мабілізацыі.
Павел Чыкаў распавядае, што Аляксандр не пайшоў 1 снежня паводле позвы на прызыўны пункт. У адказ ваенкамат паведаміў, што мае намер гвалтам адправіць яго ў войскі.
«Згодна з Указам прэзідэнта РФ аб частковай мабілізацыі прызыву падлягаюць толькі грамадзяне РФ. Іншаземцы маюць права добраахвотна заключыць толькі кантракт аб праходжанні ваеннай службы», – нагадаў праваабаронца.
Пазней да публікацыіі ў тэлеграм-канале была зроблена дапіска са спасылкай на прэсавую службу ўрада Чэлябінскай вобласці аб тым, што ваенкамат адмаўляе дакладнасць інфармацыі аб мабілізацыі замежніка.
«Нягледзячы на асабісты зварот Арлукевіча да нашых юрыстаў і дасланыя ім дакументы, застаюцца пытанні ў дакладнасці выкладзенай вышэй інфармацыі, мы яе дадаткова правяраем», – падсумаваў праваабаронца.
Тым часам, 2 снежня беларуская дзяржаўная інфармацыйная агенцыя БелТА распаўсюдзіла паведамленне наступнага зместу: «У прэс-службе пасольства Беларусі ў Расеі заявілі карэспандэнту БЕЛТА, што інфармацыя аб беларусе, якому ў Чэлябінску ўручылі мабілізацыйны парадак дня, верагодна, зʼяўляецца фэйкам».
Меркаванне дыпламатаў аб тым, што гісторыя з мабілізацыяй магчыма несапраўдная грунтуецца на тым, што названы беларус не захацеў звязацца па тэлефоне з аддзяленнем беларускай дыпламатычнай місіі ў Екацярынбургу.
«Аддзяленне пасольства ў Екацярынбургу аператыўна звязалася з Telegram-каналам, на якім зʼявілася гэтая інфармацыя, і прадставіла прамы нумар, на які мог бы звярнуцца грамадзянін. Да гэтага часу з намі ніхто не звязаўся, ніякіх асабістых дадзеных мы не атрымалі, што дзіўна ў сітуацыі, калі беларускі грамадзянін відавочна мае патрэбу ў дапамозе Рэспублікі Беларусь. Таксама пасольства ўстанавіла кантакт з ваенкамам, які нібыта падпісаў позву. Ён расказаў дыпламатам, што мабілізацыя завершана і ніякіх павестак гэтаму чалавеку яны не накіроўвалі», – цытуе БелТА паведамленне прэс-службы пасольства Беларусі ў Расеі.
Інфармацыю екацерынбургскай дыпмісіі «пацвердзілі і калегі з прэс-службы губернатара Чэлябінскай вобласці, удакладніўшы відавочныя прыкметы фейка ў размешчанай у Telegram-каналах парадку дня – груба падроблены подпіс, адсутнасць нумара на друку і гэтак далей», – дадалі беларускія дыпламаты.
У сваю чаргу, тэлелеграм-канал «Беларусь головного мозга» паведаміў, што Аляксандр Арлукевіч звязаўся з імі і расказаў працяг гісторыі.
«Ён звязаўся з намі, каб расказаць падрабязнасці гэтай гісторыі. Высветлілася, што разам з ім «запрашэнне» атрымалі яшчэ каля 80 чалавек, частка з якіх – грамадзяне Узбекістана», – гаворыцца ў паведамленні.
Па словах Аляксандра, ён паслухаўся парад і адмовіўся ісці ў ваенкамат. «Пасля гэтага да яго падышоў брыгадзір і заявіў, што ў панядзелак па яго прыйдуць і адправяць туды сілай». Пры гэтым Арлукевіч напісаў рэдакцыіі тэлеграм-канала, што з заводу ён не можа звольніцца па фінансавых прычынах.
«Я так проста не магу звольніцца. Нам 2 месяцы не плацілі заробак, абяцалі да Новага года аддаць увесь доўг, і я як бы, атрымліваецца, заняў грошы на жыццё на гэты час. І калі зараз звольнюся, то мне ніхто нічога не аддасць. Але таксама я разумею, што жыццё даражэйшае і ўсімі шляхамі буду спрабаваць пазбегнуць ваенкамата», – прыводзіць тэлеграм-канал цытату з перапіскі з Арлюкевічам.
Пры гэтым звяртае на сябе увагу каментар пад публікацыяй тэлеграм-канала «Беларусь головного мозга», аўтар якога кажа, што калі пазоў праўдзівы, то магла быць дапушчана памылка з тае прычыны, што для расейцаў літары РБ на пазове значаць перш за ўсё Рэспубліка Башкартастан.
У спробе спраўдзіць, як выглядаюць сапраўдныя пазовы ад ваенкамата ў Чэлябінску, мы знайшлі фатаграфію паперы з таго ж самага ваенкамата Цэнтральнага і Савецкага раёна Чэлябінска і Чэлябінскай вобласці і адзначылі адрозненні. Слова «ПОВЕСТКА» у «пазове Арлукевіча» напісана без прабелаў паміж кожнай літарай і ёсць граматычная памылка ў слове «года». І самае галоўнае, у іншым пазове з Чэлябінскага ваенкамата не згадваецца пашпарт «другого государства», як варыянт пасведчання асобы, але згадваецца важны пры мабілізацыі грамадзяніна РФ СНИЛС (Страховой номер индивидуального лицевого счёта), чаго няма ў «пазове Арлукевіча».
Антон Тачняк belsat.eu
