Пракурор запатрабаваў 1,5 года турмы журналісту Алегу Груздзіловічу. Пра гэта паведамляе радыё «Свабода».
Разгляд справы журналіста суд Савецкага раёну Менску пачаў 2 сакавіка. Яго абвінавачваюць па трох эпізодах удзелу ў нібыта масавых беспарадках падчас пратэстаў 2020 году. Дапусцілі на суд толькі жонку Алега Груздзіловіча і журналістку расейскага агенцтва «Спутник».
Пры гэтым у судзе жонцы забаранілі здымаць, размаўляць з Алегам, нават абмяняцца жэстамі, пасадзілі яе далёка ад шкляной кабінкі для падсудных. Але дазволілі здымаць журналістцы.
У спрэчках пракурор запатрабаваў прызнаць Алега вінаватым і пакараць яго на 1,5 года зняволення ў калоніі агульнага рэжыму.
Пацярпелым бокам у справе выступіў «Менсктранс», які заявіў, што Алег нібыта нанёс шкоду ім у ў 56 тысяч рублёў акцыямі 16 жніўня, 11 і 18 кастрычніка 2020 году, бо ў Менску быў спынены рух.
Алег Груздзіловіч адказаў, што 16 жніўня меў акрэдытацыю МЗС Беларусі ў якасці карэспандэнта радыё «Свабода» і быў у камізэльцы з надпісам «Прэса», а 11 і 18 кастрычніка працаваў як пазаштатны журналіст «Народнай волі», што пацвердзіў галоўны рэдактар выдання.
Вырак чакаецца 3 сакавіка а 12.00.
23 снежня 2021 людзі ў масках забралі Груздзіловіча з дому ў Менску, выламалі дзверы. Алегу змянілі меру стрымання і ўзялі пад варту як падазраванага па крымінальнай справе «Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх» (арт. 342 КК). Алег знаходзіцца ў СІЗА-1.
ПС belsat.eu
