Адбылася чарговая атака на інфраструктуру Беларускай чыгункі. На вакзалах – вялікія чэргі
Супольнасць беларускіх чыгуначнікаў у тэлеграме паведамляе пра чарговую кібератаку на інфраструктуру Беларускай чыгункі.
«Сёння, у 12 гадзін паводле Менскага часу была зробленая чарговая атака на сеткавую інфраструктуру Беларускай чыгункі», – гаворыцца ў паведамленні.
Адзначаецца, што не працуюць сістэма ГІД (Графік выкананага руху), Нататнік кіраўніка, Абаненцкі пункт, аўтаматызаваная сістэма Аўтадыспетчар і іншае спадарожнае праграмнае забеспячэнне. Праз тое, што закранутая сістэма ДЦ «Нёман», назіраюцца праблемы з рухам цягнікоў.
Чытачы «Белсату» паведамляюць пра вялікія чэргі на чыгуначным вакзале ў Менску.
Абноўлена. Вечарам 2 сакавіка Міністэрства ўнутраных справаў пацвердзіла, што з 28 лютага на 1 сакавіка было зафіксавана тры факты знішчэння сігнальнага абсталявання і блакавання чыгуначных каляін у Гомельскай, Магілёўскай і Менскай вобласцях. МУС сцвярджае, што затрымаў у Стоўбцах мужа і жонку, якія спрабавалі падпаліць бярвенне на каляіне, «ім пагражае да 20 гадоў пазбаўлення волі». У Жодзіне, заяўляе МУС, затрыманы яшчэ адзін 35-гадовы «рэйкавы партызан» (так яго называе само МУС). Усе гэтыя дзеянні МУС лічыць «тэрарызмам».
Пасля пачатку вайны Расеі супраць Украіны, якую падтрымалі ўлады Беларусі, «BYPOL» у рамках падрыхтоўчай часткі рэалізацыі плана «Перамога» ажыццяўляе спецаперацыі на БЧ, каб прыпыніць рух вайсковых эшалонаў да ўкраінскай мяжы.
У ноч з 26 на 27 лютага была выведзеная са строю электрычная цэнтралізацыя і кантактная сетка на некалькіх участках Беларускай чыгункі.
27 лютага кіберпартызаны заявілі, што вывелі са строю маршрутызатары і паралізавалі сістэму дыспетчарскай цэнтралізацыі «Нёман». У выніку многія працоўныя кампʼютары засталіся без падлучэння да сеткі прадпрыемства. Купіць квіткі онлайн было немагчыма, а лагістычныя кампаніі не маглі атрымаць доступ да асабістых кабінетаў.
У ноч з 28 лютага на 1 сакавіка былі спаленыя дзве шафы ўпраўлення СЦБ (прылада сігналізацыі, цэнтралізацыі і блакавання) на ўчастках абслугоўвання Баранавіцкага і Гомельскага аддзяленняў БЧ, чым была парушана праца святлафораў і стрэлачных пераводаў і заблакаваны рух на гэтых участках чыгункі. Таксама на ўчастку абслугоўвання Магілёўскага аддзялення БЧ былі закарочаныя рэйкавыя ланцугі.
«На сённяшні дзень Беларуская чыгунка не можа гарантаваць бяспеку сваёй інфраструктуры. Вайсковыя эшалоны з боку РФ не перамяшчаюцца па начах. Лакаматыўныя брыгады пачалі баяцца выходзіць на змены і везці цягнікі», – адзначаюць чыгуначнікі.
ПС belsat.eu
