Аляксандар Лукашэнка заявіў, што Беларусь і Расея прапрацуюць пытанне аб адкрыцці рэйсаў у Крым, і дадаў, што асабіста папрасіў аб гэтым Пуціна.
Раней у Крым можна было трапіць праз Украіну, аднак пасля таго, як краіна закрыла сваю паветраную прастору, а Беларусь – наземныя мяжы, адзіным варыянтам трапіць у Крым застаецца шлях праз Расею.
«У нас ёсць свой санаторый у Крыме, у Місхоры, куды людзі заўсёды ездзілі, лёталі. Каб не абвастраць адносіны, мы праз Украіну – хто на цягніку, хто на аўтамабілі, хто на самалёце. Зараз закрылі неба. Я Пуціну сказаў: «Ты падумай, як нам трапіць у Крым», – сказаў Лукашэнка.
«Пры жаданні паляцець у Крым – мне як сёння? Толькі праз Расею. Таму мне давядзецца прэзідэнта Пуціна папрасіць, каб ён неяк мяне адвёз у Крым», – дадаў Лукашэнка.
Таксама ён адзначыў, што «не перажывае» з гэтай нагоды: «Яны зладзілі гэтую каніцель, гэтую правакацыю. Таму з мяне ўжо нічога не возьмеш, як і з астатніх беларусаў».
Раней кіраўнік «Белавія» Ігар Чаргінец заявіў, што пакуль у Крым авіярэйсаў чакаць не варта.
АД, belsat.eu