Новы контрнаступ Украіны можа распачацца ўжо ўвесну, адразу пасля таго як будзе вычарпаны наступ расейцаў – такі прагноз дае начальнік Галоўнага ўпраўлення выведкі Міністэрства абароны Украіны Кірыла Буданаў, піша «The Telegraph».
Буданаў лічыць, што расейскі наступ будзе вычарпаны на пачатку вясны.
«Мы робім ход, вораг робіць ход. Цяпер чарга ворага. Наступ скончыцца, а потым пачнецца наш», – кажа вайсковы чыноўнік.
Украіна не праводзіла буйных наступальных аперацыяў супраць расейскіх войскаў пасля завяршэння летняга контрнаступу. Цяпер украінскія вайскоўцы перайшлі да актыўнай абароны і ўзводзяць вялікія ўмацаванні ў тыле.
Паводле Буданава, Расея ў рамках свайго цяперашняга наступу хоча выйсці на адміністрацыйныя межы Данецкай і Луганскай вобласцяў. Вораг атакуе Купянск (Харкаўская вобласць), Ліман, Бахмут і Аўдзееўку (Данецкая вобласць) адначасова.
Начальнік Галоўнага ўпраўлення выведкі прызнае, што расейскія войскі дасягнулі «пэўных поспехаў» каля Аўдзееўкі, але, са словаў Буданава, «гэта зусім не тое, чаго яны чакалі, нават блізка».
Марыя Міхалевіч belsat.eu
