Суд у Маскве прызначыў Аляксандру Няўзораву 8 гадоў калоніі паводле абвінавачання ў распаўсюдзе «фэйкаў» пра армію. Яму таксама забаранілі 4 гады адміністраваць інтэрнэт-рэсурсы, піша выданне «Медиазона». Журналіст цяпер не ў Расеі.
Басманны раённы суд Масквы прызнаў журналіста Аляксандра Няўзорава вінаватым у распаўсюдзе «фэйкаў» пра армію. Нагодаю сталі ягоныя публікацыі пра Бучу і Марыупаль. Суд пагадзіўся з версіяй следства пра тое, што журналіст дзейнічаў паводле матываў палітычнай варожасці, і прыгаварыў яго да 8 гадоў калоніі агульнага рэжыму.
Пра крымінальную справу супраць Няўзорава стала вядома ў сакавіку 2022 года. Журналіста абвесцілі ў вышук і завочна арыштавалі.
Ён з’ехаў з Расеі тады ж, у сакавіку. У чэрвені прэзідэнт Уладзімір Зяленскі надаў Аляксандру Няўзораву і ягонай жонцы Лідзіі грамадзянства Украіны.
Раней у Расеі паводле гэтага ж артыкулу аб «фэйках» пра армію да 8,5 года калоніі прысудзілі апазіцыйнага палітыка Іллю Яшына за стрым пра забойствы ў Бучы.
Сяргей Крот belsat.eu