Міністр аховы здароўя Беларусі Дзмітрый Піневіч дазволіў студэнтам 6-га курсу медычных універсітэтаў, якія былі прыцягнутыя да працы ў лякарнях і паліклініках, выпісваць лісткі непрацаздольнасці хворым. Гэта вынікае з загаду № 113, які Піневіч падпісаў 1 лютага.
Паводле загаду, студэнтам-шасцікурснікам, прыцягнутым да надання медычнай дапамогі ў амбулаторна-паліклінічных умовах, дазволена праводзіць экспертызу часовай непрацаздольнасці.
Пры гэтым яны маюць кіравацца інструкцыяй аб парадку правядзення экспертызы часовай непрацаздольнасці, зацверджанай пастановаю № 104 Міністэрства аховы здароўя Рэспублікі Беларусь ад 24 снежня 2014 года.
Начальнікі галоўных упраўленняў у справе аховы здароўя аблвыканкамаў і старшыня Камітэту аховы здароўя Менскага гарвыканкаму мусяць правесці са студэнтамі ўводны інструктаж з праверкай ведаў у пытаннях экспертызы часовай непрацаздольнасці, афармлення і выдачы лісткоў непрацаздольнасці і даведак пра часовую непрацаздольнасць.
Нагадаем, што 31 студзеня падпісалі загад № 108, які дазваляе дактарам ставіць дыягназ «інфекцыя COVID-19» без тэставання.
ЗК belsat.eu