У гісторыі Нямеччыны не было такога, каб пасля парламенцкіх выбараў і паспяховых перамоваў пра стварэнне кіроўнай кааліцыі кандыдат на пасаду канцлера не атрымліваў бы ўхвалення ў Бундэстагу.
Фрыдрых Мэрц стаўся кандыдатам на ролю канцлера краіны як лідар кааліцыі, што атрымала больш за палову месцаў у парламенце, на прапанову прэзідэнта Нямеччыны Франка-Вальтэра Штайнмаера. Аднак пасля гэтага Мэрц не атрымаў неабходных 316 галасоў дэпутатаў Бундэстагу, каб зрабіцца канцлерам Нямеччыны, набраўшы толькі 310.
Гэта значыць, што ў сфармаванай па выніках парламенцкіх выбараў кіроўнай кааліцыі як мінімум 18 парламентарыяў адхілілі кандыдатуру Мэрца.
Такога яшчэ ніколі не здаралася, і пакуль Бундэстаг не ўзгадніць новай кандыдатуры, абавязкі канцлера працягне выконваць Оляф Шольц, якому зімой абвясцілі вотум недаверу.
Пазней, 6 траўня, стала вядома, што другі тур выбараў канцлера Германіі таксама адбудзецца сёння: канцлерам зробіцца той, хто набярэ больш за палову галасоў (больш за 316 галасоў). Хутчэй за ўсё, з другой спробы гэта ўдасца Мэрцу, які перацягне шэсць чалавек на свой бок.
Пасля гэтага прэзідэнт павінен будзе цягам сямі дзён ухваліць новую кандыдатуру канцлера. Калі Бундэстаг ізноў не вызначыцца, прэзідэнт або прызначыць канцлерам таго, хто заняў першае месца ў заключным галасаванні, або распусціць Бундэстаг – і прызначыць новыя выбары.
Нагадаем, у лістападзе 2024 года канцлер Нямеччыны Оляф Шольц адправіў у адстаўку міністра фінансаў і лідара дэмакратаў Крыст'яна Лінднэра, які крытыкаваў эканамічную палітыку канцлера. Гэта пазбавіла Шольца парламенцкай большасці, а 16 снежня Бундэстаг вынес яму вотум недаверу.
Адразу пасля гэтага галоўным прэтэндэнтам на ролю канцлера зрабіўся даўні супернік Ангелы Мэркель – Фрыдрых Мэрц, погляды якога больш праваліберальныя, але ён не раз выказваўся пра падтрыманне Украіны. Фрыдрых Мэрц адзначаў: Уладзімір Пуцін вядзе агрэсіўную вайну не толькі супраць Украіны, але і супраць Еўропы, таму Нямеччыне патрэбная «змена парадыгмы ў палітыцы абароны».
Тэса Анэйда belsat.eu
