Ранкам войскі РФ ізноў здзейснілі некалькі дзясяткаў ракетных удараў па ўкраінскіх гарадах.
Сёння ранкам войскі РФ ізноў здзейснілі некалькі дзясяткаў ракетных удараў па ўкраінскіх гарадах. Пасля невялікага перапынку расейцы зноў скарысталі тэрыторыю Беларусі для ўчынення агрэсіі. Украінская выведка на сваёй старонцы ў Facebook паведамляе, што такім чынам Расея намагаецца ўцягнуць Беларусь у ваенныя дзеянні.
Галоўнае ўпраўленне ўкраінскай выведкі заявіла, што ў ноч на 25 чэрвеня па тэрыторыі Украіны быў нанесены масаваны ракетна-бомбавы ўдар. Расейскія бамбавікі працавалі ў тым ліку і наўпрост з тэрыторыі Беларусі.
Украінскі бок паведамляе, што для атакі задзейнічалі 6 самалётаў Ту-22, што запусцілі 12 крылатых ракетаў Х-22. Пункт пуску – зона гораду Петрыкаў, што месціцца каля Мазыра, прыкладна за 50-60 км ад дзяржаўнай мяжы Украіны.
Выведка Украіны заяўляе, што бамбавікі ўзляталі з аэрапорту «Шайкоўка» Калужскай вобласці Расеі, праляталі праз Смаленскую вобласць, каб зайсці ў паветраную прастору Беларусі. Так пускалі ракеты і вярталіся ў «Шайкоўку».
Расейцы наносілі ўдары па Кіеўскай, Чарнігаўскай, Сумскай вобласцях. Галоўнае ўпраўленне выведкі Украіны адзначыла, што гэта першы выпадак нанясення авіяцыйных удараў па Украіне з тэрыторыі Беларусі.
,,«Сённяшні абстрэл наўпрост звязаны з высілкамі крамлёўскіх уладаў уцягнуць Беларусь у вайну ва Украіне ў якасці беспасярэдняга ўдзельніка», – перакананыя ў выведцы.
Нагадаем, што ў выніку абстрэлу адзін вайсковец загінуў, яшчэ адзін быў паранены. Пра гэта паведаміў кіраўнік абласной вайсковай адміністрацыі Жытоміру Віталь Бунэчка. Паводле падлікаў маніторынгавай групы «Беларускі Гаюн», з Беларусі па Украіне з лютага да траўня запусцілі больш за 630 ракетаў.
Раман Лугоўскі belsat.eu
