Раней ён працаваў з Украінай і Расеяй.
Еўразвяз 20 красавіка прызначыў часовага паверанага ў справах ЕЗ у Беларусі – ім стане Стээн Нёрлёў (Steen Nørlov). Пра гэта абвесціў вярхоўны прадстаўнік ЕЗ у справах замежнай палітыкі і палітыкі бяспекі Жузэп Бурэль.
Раней Стээн Нёрлёў узначальваў офіс прадстаўніка генеральнага сакратара Рады Еўропы ў справе каардынацыі праграмаў супрацы Рады Еўропы ва Украіне. Ён таксама быў намеснікам кіраўніка дыпмісіі ў пасольстве Даніі ў Расеі.
Былы кіраўнік прадстаўніцтва Еўразвязу ў Беларусі Дырк Шубэль пакінуў краіну летам 2021 года на патрабаванне ўладаў Беларусі. Пасля ягонага адʼезду еўрапейскую дыпмісію ў Менску ўзначаліла ягоная памочніца Эвэліна Шульц. Да прызначэння Стээна Нёрлёва яна выконвала функцыі часовага паверанага ў справах ЕЗ у Беларусі.
Нагадаем, летась у верасні лукашэнкаўскія сілавікі на некалькі гадзінаў затрымалі дыпламатку пасля выхаду з Менскага гарадскога суда і запісалі з ёй відэа. Вонкавапалітычнае ведамства Еўрапейскага Звязу пасля гэтага інцыдэнту выказала рашучы дыпламатычны пратэст.
Алена Рувіна belsat.eu
