11 гадоў таму яна наведвала Менск і сустракалася з Наталляю Пінчук.
У 2012 годзе, пасля сваёй першай перамогі на «Еўрабачанні», шведская спявачка Лёрээн публічна выступала з падтрыманнем старшыні ПЦ «Вясна» Алеся Бяляцкага, які тады таксама заставаўся ў зняволенні з палітычных прычынаў.
Як нагадвае spring96.org, Лёрээн у 2012 годзе наведала Менск і сустрэлася з жонкаю палітычнага вязня Алеся Бяляцкага Наталляю Пінчук, праваабаронцам Валянцінам Стэфановічам і журналістамі, каб больш даведацца пра лёс беларускіх палітзняволеных і сітуацыю ў Беларусі.
Лёрээн пакінула аўтограф Алесю Бяляцкаму: «Трымайцеся свайго сэрца і розуму!»
Таксама спявачка падпісала петыцыю кампаніі «Праваабаронцы супраць смяротнага пакарання ў Беларусі». Бяляцкі тады даслаў Лёрээн з-за кратаў ліст з падзякаю.
Сёлета Лёрээн ізноў перамагла на «Еўрабачанні», а Алесь Бяляцкі зноў застаецца за кратамі. Пазбаўлены волі і Валянцін Стэфановіч, які браў удзел у сустрэчы са спявачкай у Менску ў 2012-м.
Нагадаем, што 3 сакавіка суддзя Марына Запаснік прызначыла заснавальніку праваабарончага цэнтру «Вясна» і лаўрэату Нобэлеўскай прэміі міру Алесю Бяляцкаму 10 гадоў калоніі, намесніку старшыні «Вясны» і віцэ-прэзідэнту FIDH Валянціну Стэфановічу – 9 гадоў калоніі, каардынатару кампаніі «Праваабаронцы за свабодныя выбары» і юрысту Уладзіміру Лабковічу –7 гадоў калоніі, праваабаронцу «Вясны» Дзмітрыю Салаўёву – 8 гадоў калоніі завочна.
Глеб Нержын belsat.eu
![Кадр з фільма. Фота: скрыншот з відэа [TNO/OTL] Custom Super Events Belarus | Post-Lukashenko / YouTube](https://s2.tvp.pl/images2/b/3/5/uid_b358422349bd4808bc86d47cb7901563_width_499_play_0_pos_0_gs_0_height_280.png)
