Пазачарговы агульны сход акцыянераў ААТ «БПС-Сбербанк» 23 чэрвеня абраў новы склад назіральнай рады банку.
Правядзенне пазачарговага сходу ў банку патлумачылі зацвярджэннем гадавым агульным сходам акцыянераў змяненняў і дапаўненняў у статут установы, паводле якіх, колькасны склад назіральнай рады паменшыўся з 13 да 11 чалавек.
Рашэннем сходу акцыянераў ААТ «БПС-Сбербанк» у склад новай назіральнай рады абралі пяць прадстаўнікоў расейскага «Сбербанку» (Наталля Аўдзеенка, Рыгор Анашкін, Аляксей Ашуркаў, Павел Барчуга, Цімур Козінцаў), тры незалежныя дырэктары (Галіна Кухарэнка, Святлана Малыхіна, Людміла Папова), а таксама Лілія Астаповіч, якая ў папярэднім складзе ўваходзіла ў аўдытарскі камітэт.
У склад назіральнай рады таксама ўвайшлі першы намеснік старшыні Дзяржаўнага камітэту па маёмасці Аляксей Васільеў як прадстаўнік дзяржавы і былы кіраўнік Нацбанку Пётр Пракаповіч, які старшыняваў у папярэднім складзе і ўваходзіць у працоўную групу пры адміністрацыі кіраўніка краіны.
Як адзначыў у каментары belsat.eu Пётр Пракаповіч, змяненні ў складзе Назіральнай рады выкліканыя выключна зменамі ў статуце і не звязаныя з апошнімі падзеямі ў «Белгазпрамбанку».
«Да чаго гісторыя іншага банку да нашага банку? Наш банк мае ўласную гісторыю», – адзначыў былы старшыня Нацбанку.
Адказваючы на пытанне адносна свайго веку, Пётр Пракаповіч, якому сёлета спаўняецца 78 гадоў, падкрэсліў, што «справа не ў веку, а ў тым, хто і як працуе».
ААТ «БПС-Сбербанк» з’яўляецца адным з найбуйнейшых банкаў Беларусі паводле памеру актываў. Чысты яго прыбытак за 2019 год склаў Br 107,2 млн пры рэнтабельнасці капіталу ў 15,8 %. Асноўным акцыянерам «БПС-Сбербанку» выступае расейскі «Сбербанк» (98,43 % акцыяў).
МГ belsat.eu