Прэзідэнт Францыі Эманюэль Макрон 23 кастрычніка выступаў на міжрэлігійным саміце «Крык аб міры» і расказаў, як бачыць сканчэнне вайны ва Украіне, піша «Le Figaro».
Паводле Эманюэля Макрона, мір ва Украіне магчымы і ў нейкі момант ён наступіць. Але гэты момант будзе тады, «калі ўкраінскі народ і ягоныя лідары вырашаць ягоныя ўмовы». Тады, лічыць Макрон, абодва бакі змогуць скласці мірнае пагадненне.
Таксама ён казаў, што трэба адрозніваць нападнікаў і ахвяраў і не заставацца ў баку, каб не дапусціць сітуацыі, у якой «закон мацнейшага стане ўсеагульным законам». Разам з тым, Макрон заклікаў не забываць, што вайна ідзе не толькі ва Украіне, але і ў Арменіі, і ў Сірыі, і ў Іраку, і на Афрыканскім Рогу, і на Блізкім і Сярэднім Усходзе.
Два дні таму ў Бруселі Макрон нагадаў на выступе перад Еўрапейскай радай, што Францыя падтрымлівае ўкраінскі супраціў нападу, што супраць Расеі ўвялі санкцыі і што пры гэтым Францыя вядзе размовы з уладамі Расеі і Украіны, каб дамагчыся міру на прымальных для Украіны ўмовах.
Макрона раней не раз крытыкавалі за слабую дапамогу Украіне і нерашучасць у выказваннях аб вайне ва Украіне. Крытыка гучала нават ад іншых краінаў Еўразвязу. Таксама падобная крытыка была на адрас канцлера Нямеччыны Оляфа Шольца.
Ды з цягам часу краіны старой Еўропы мяняюць рыторыку. Напрыклад, калі ў чэрвені Францыя перадавала Украіне бронемашыны, Макрон казаў песімістычна: «Ніхто не разглядае магчымасці заканчэння вайны ў бліжэйшыя тыдні або месяцы». А ў пачатку кастрычніка Макрон ужо абяцаў прэзідэнту Украіны Уладзіміру Зяленскаму, што дапаможа аднавіць тэрытарыяльную цэласнасць Украіны.
Алесь Наваборскі belsat.eu
