Дзяржаўныя медыі паведамілі, што мужчына быў «прыхільнікам збеглых экстрэмістаў», якія і пераправілі яго ў Беларусь. Ён нібыта планаваў тэракты, пры затрыманні аказаў супраціў і быў смяротна паранены. КДБ зладзіў аперацыю, названую Аляксандрам Лукашэнкам «бліскучай», 19 сакавіка.
У дзяржаўным тэлеэфіры паказалі «аператыўнае відэа» спецслужбаў. Сцвярджаецца, што на запісы – штурм кватэры, якую арандаваў падазраваны, а таксама кадры сачэння за ім у Горадні.
Каардынатар беларускай экспертнай сеткі «Наше мнение» Вадзім Мажэйка ў каментары «Белсату» адзначыў, што гэтае відэа «фактычна нічога не паказвае і нічога не даказвае»:
«Нам дэманструюць нейкія стрэлы ў пустую кватэру, у якой нічога не бачна, дэманструюць столь, нейкі панэльны дом – няма ніякай канкрэтыкі. Заўсёды, калі ўлады дэманструюць відэа, каб нешта пацвердзіць, а ў відэа нічога няма, гэта выклікае сумневы, як кажуць, «ці быў увогуле хлопчык». Канкрэтыкі няма, і складаецца ўражанне, што гэта нейкая пастаноўка».
Эксперт згадаў гісторыю з перастрэлкай у кватэры менскага праграміста Андрэя Зельцара, калі таксама было абнародаванае відэа, «хай сабе і дзіўнаватае».
«Але ўсё ж было зразумела, што гэта, хто гэта, знайшліся нейкія сваякі, нейкія сувязі. А тут – толькі назвалі імя, грамадзянства і потым сказалі, што гэта фальшывы пашпарт. І не зразумела, што ў ім фальшывага, можа і імя таксама, і грамадзянства. А можа, гэта не расеец, а паляк ці беларус?» – сказаў Мажэйка.
Суразмоўца «Белсату» патлумачыў, чаму дзяржаўныя медыі паведамілі пра «след збеглых» у гэтай справе. Эксперт мяркуе, што такім чынам цяперашнія ўлады «падмацоўваюць тэзы сваёй прапаганды»:
«Маўляў, мы кажам, што зараз прыйдуць збеглыя тэрарысты, дык вось, глядзіце: збеглы тэрарыст. Прапаганда ўвесь час раскручвае наратыў, што зараз усе гэтыя «бзеглыя» з Польшчы, нейкія «байполаўцы» ці «каліноўцы» прыйдуць са зброяй і будуць беларусаў забіваць, чыніць тэракты. Аднак гэтага не адбываецца».
Гісторыя з «гарадзенскім тэрарыстам» нагадала Мажэйку іншыя гучныя справы кшталту атручэння водаправоду пацукамі ці прарыву джыпа праз мяжу з Украінай:
«Калі ўлады, сілавікі нешта выдумляюць, яны любяць спачатку даць нейкія падрабязнасці, потым не прыводзіцца аніякіх доказаў, і тэма фактычна знікае. Адпаведна, зараз будзем глядзець: калі ўлады не пакажуць нейкія відэа, доказы, канкрэтыку, то яе можна будзе расследаваць, а калі ніякіх доказаў не будзе, то выглядае, што, сапраўды, гэта яшчэ адзін «джып» або яшчэ адна «Фрау А.».
Сяргей Крот belsat.eu