Расейска-беларуская мяжа закрытая для транспартавальнікаў ЕАЭС. Казахстан абураны
З 8 студзеня праз беларуска-расейскую мяжу ў Смаленскай і Бранскай вобласцях могуць праязджаць толькі кіроўцы-міжнароднікі з Беларусі і Расеі. Пра гэта распавёў міністр гандлю Казахстану Арман Шакаліеў. Цяпер Казахстан вядзе перамовы, каб залагодзіць справу.
«Сёння ідуць перамовы з нашымі калегамі з расейскага, з беларускага бакоў наконт таго, што гэта абмяжоўвае свабоду перамяшчэння тавараў. Нагадаю, што 8 студзеня пачало дзеяць гэтае патрабаванне. Калі мы пытання не ўрэгулюем, то мы ў афіцыйным парадку будзем яго выносіць на разгляд камісіі [Еўразійскай эканамічнай камісіі. – Рэд.] як барʼер. Мая асабістая думка – гэта барʼер, што перашкаджае перамяшчэнню тавараў», – сказаў Арман Шакаліеў.
Паміж краінамі ЕАЭС адсутнічае мытная мяжа і Саюз дэкларуе свабоднае перамяшчэнне тавараў.
Памежнае ўпраўленне ФСБ для Бранскай вобласці пацвердзіла журналістам, што такая забарона для кіроўцаў з трэціх краінаў, у тым ліку з ЕАЭС, сапраўды зʼявілася.
Арсен Рудэнка belsat.eu
