Брытанская выведка пацвярджае, што Украіна прарвала пазіцыі Расеі ў некаторых раёнах
Разведка Міністэрства абароны Вялікай Брытаніі ў сваёй справаздачы за 10 чэрвеня адзначае, што за апошнія двое содняў у некалькіх сектарах усходу і поўдня Украіны былі праведзеныя «значныя» ўкраінскія аперацыі.
Украінскія сілы «верагодна, дабіліся добрага прагрэсу» і «прарвалі першую лінію расейскай абароны», дадалі ў брытанскім Мінабароны. Аднак у іншых вобласцях «украінскі прагрэс быў павольнейшым».
Тым часам дзеянні Расеі былі «змяшанымі»: некаторыя падраздзяленні «верагодна, праводзяць верагодныя манеўраныя абарончыя аперацыі, тады як іншыя адступілі ў пэўнай бязладзіцы на тле павелічэння колькасці паведамленняў пра расейскія страты, калі яны адыходзяць праз свае ўласныя мінныя палі».
Таксама адзначаецца, што расейскія ВПС былі незвычайна актыўнымі над поўднем Украіны, дзе паветраная прастора больш спрыяльная для Расеі, чым у іншых частках краіны».
«Аднак застаецца незразумелым, ці былі эфектыўнымі тактычныя авіяўдары», – адзначаюць у выведцы.
Як раней заявілі аналітыкі амерыканскага Інстытуту вывучэння вайны (ISW), украінскія вайскоўцы працягваюць контрнаступальныя дзеянні сама меней на чатырох участках фронту.
Расейскія войскі адбілі абмежаваныя і лакалізаваныя наземныя атакі ЗСУ ў раёне Крамянной. Аднак украінскія войскі прасунуліся на 1,2 кіламетра падчас наступальных аперацыяў пад Бахмутам.
ЗСУ таксама працягнулі абмежаваныя контрнаступальныя аперацыі на захадзе Данецкай вобласці паблізу граніцы Данецкай і Запарожскай вобласцяў і дасягнулі тактычных поспехаў на гэтых напрамках.
Якуб Хруст belsat.eu
