Кіраўнік Расейскай праваслаўнай царквы патрыярх Кірыл у сваёй казані 6 лістапада ў Маскве адмовіў беларусам і ўкраінцам у адметнасці, а жыхарам сваёй краіны – у праве не быць праваслаўнымі.
Патрыярх заявіў, што «на нашую зямлю прыйшла гэтая бяда – міжусобная сварка» ўнутры рускага народу.
«Калі я кажу «рускі», маю на ўвазе і ўкраінцаў, і беларусаў – тых самых рускіх, пра якіх «Аповесць мінулых гадоў» кажа», – сказаў ён.
Сваю думку патрыярх працягнуў тым, што наўпрост звязаў рускасць з праваслаўем.
«Вельмі важна, мае дарагія, каб разуменне сваёй прыналежнасці да рускага народу суправаджалася сёння глыбокай праваслаўнай верай. А тыя, хто кажа «мы рускія», а ў храм не ходзіць? Задайце сабе пытанне: а вы спадчыннікі сваіх бацькоў, дзядоў, бабуль, прадзедаў і прашчураў, якія з верай звязвалі сваё жыццё? І калі вы не ёсць іхнымі спадчыннікамі, то ў якім сэнсе вы можаце казаць пра сябе як пра рускіх людзей?» – заявіў кіраўнік РПЦ.
Служба бяспекі Украіны (СБУ) паведаміла, што падазрае кіраўніка Расейскай праваслаўнай царквы патрыярха Кірыла ў злачынствах паводле трох крымінальных артыкулах. У тым ліку ў замаху на тэрытарыяльную цэласнасць і недатыкальнасць Украіны.
СБУ зазначае, што кіраўнік РПЦ неаднаразова заклікаў вернікаў да адзінства ў вайне супраць Украіны.
Якуб Хруст belsat.eu