«Ніводнага трактара на полі няма». Лукашэнка ўчыніў разнос сваім чыноўнікам з-за праблемаў у сельскай гаспадарцы
Аляксандр Лукашэнка 5 жніўня наведаў Пастаўскі раён Віцебскай вобласці і застаўся незадаволены тэмпамі ўборачнай кампаніі, паведамляе праўладны тэлеграм-канал «Пул первого».
Падчас праверкі Лукашэнку далажылі аб ходзе ўборачнай кампаніі па краіне і Віцебскай вобласці, на што ён адказаў, што ўборачная ідзе «пакуль сярэдненька». «Трэба павялічыць тэмп. На гадзіну раней пачынаць. На гадзіну пазней заканчваць. Але трэба павялічваць тэмпы», – сказаў ён.
Таксама Лукашэнка нагадаў чыноўнікам, што ў полі павінна быць «жалезная дысцыпліна» і зноў загаварыў пра вайну:
«Міліцыя, войска – прымусь працаваць усіх!!! Вайна ж горшая, чым жалезная дысцыпліна. Вайна пачынаецца тады, калі мы нюх губляем і перастаем працаваць».
Апроч гэтага Лукашэнка асабіста адчытаў спачатку міністра сельскай гаспадаркі Ігара Брыло за дрэнны корм для ската:
«Калі толькі мне Дзяржкантроль даложыць, што ты гніллём корміш жывёлу ў краіне, персанальна адкажаш галавой. Ты бачыў гэтыя ямы? Туды ў чэрвені месяцы паклалі сянаж і ўжо ёсць гэтая інфармацыя, што адбылося? Пасля дажджоў усё туды зацякло. Жыжа. Ты лекар, ветэрынарны лекар, галавой за гэта адкажаш. Мы што, жадаем жывёлу загубіць? І потым ахаць і вохкаць, што ў нас падзеж».
Дасталася і былому міністру сельскай гаспадарцы, цяперашняму віцэ-прэм’еру Леаніду Зайцу. Менавіта яго ў 2019 годзе Лукашэнка адчытваў за «абасраных кароў»:
«Каб была жалезная дысцыпліна. Трэба табе войска – падлучым войска, патрэбна міліцыя – кінем сюды ўсе сілы. Разбесціліся да крайнасці. Ніводнага трактара на полі няма».
Таксама Лукашэнка паабяцаў «паздымаць галаву ўсім», калі не будуць выпраўленыя ўсе ягоныя заўвагі.
Алена Рувіна belsat.eu
