«Не стаў халтуршчыкам»: Глобус пра Анціпава на ягонай першай выставе


Працы Аляксандра Анціпава шмат гадоў пыліліся на антрэсолях, іхны аўтар не быў шырока вядомы пры жыцці. Праз два гады пасля смерці нашчадкі зладзілі ягоную першую асабістую выставу – у Музеі Петруся Броўкі.

Зарганізавалі дэбют трое сыноў і дачка мастака. Для знаёмства з бацькаваю творчасцю абралі графічныя працы, створаныя ў 70-ыя. А дапамог ім Адам Глобус, бо ўпэўнены: кожны мастак мае права на сваю першую выставу.

«Ён не стаў кан’юнктуршчыкам, не стаў халтуршчыкам, ён у сваіх станковых, графічных працах застаўся вельмі шчырым мастаком. Ён зрабіў няшмат, але гэта няважна. Важна тое, што мы навучыліся цаніць сваіх бацькоў, і будзем спадзявацца, што дзеці навучацца цаніць нас», – кажа мастак і пісьменнік Адам Глобус.

Аляксандр Анціпаў быў вядомы ў вузкім коле – у маладосці наведваў легендарны гурток Кіма Хадзеева, дзе вяліся філасофскія ды антыкамуністычныя размовы. Праз гэта нават не паступіў у Тэатральна-мастацкі інстытут. Але заўжды заставаўся мастаком – на жыццё зарабляў афармленнем школаў ды вайсковых частак, а для сябе пісаў у розных тэхніках, нават у апошнія гады, калі вёў досыць закрыты лад жыцця.

«Ён лічыў сябе геніяльным мастаком, і неаднаразова гэта казаў. Я толькі з ягоных словаў магу меркаваць, які ён мастак, таму калі яму верыць, то значыць, так і ёсць», – кажа Павел Анціпаў, сын мастака.

Гэта толькі маленькая частка працаў з хатняга архіву. Таму, магчыма, выстава Аляксандра Анціпава першая, але не апошняя.

Аляксандра Дорская

Глядзі таксама
Каментары