Бранятанкавы кулак Пуціна: сакрэтныя тэхналогіі і паказуха


Адразу шэсць відаў новай бранятанкавай тэхнікі праедзе вуліцамі Масквы падчас парада 9 траўня. У тым ліку – засакрэчаны танк Т-14 «Армата», які мае стаць асноваю танкавых войскаў Расеі. Аднак гэты ўнушальны паказ новай тэхнікі на справе можа стацца банальнаю паказухай.

Расейскае міністэрства абароны адрапартавала, што ўся найноўшая тэхніка ўжо трапіла ў войскі ды апублікавала фотаздымкі з рэпетыцыяў параду. Пакуль што ўся новая бранятэхніка прыкрытая брэзентам, відаць, праз сакрэтнасць праектаў.

Т-14 «Армата»

Падчас параду па Краснай плошчы праедзе 10 танкаў «Армата». Паводле Міністэрства абароны новы танк адрозніваецца «прынцыпова новымі тактыка-тэхнічнымі характарыстыкамі ды новым аўтаматам падачы боепрыпасаў». Танк атрымаў назву дзякуючы новастворанай аднайменнай цяжкай гусенічнай платформе. Танк «Армата» мае замяніць цяперашні асноўны баявы танк Т-90, які быў створаны напрыканцы 1980-х.

Артылерыйская ўстаноўка «Коалиция-СВ»

Новая самаходная гаўбіца на гусенічнай платформе «Армата». На парадзе пакажуць 8 такіх машын, агулам іх сабрана толькі 12. Адна з адметнасцяў гэтай устаноўкі – магчымасць працы ў рэжыме «Шквал вагню», калі ўстаноўка робіць некалькі стрэлаў запар такім чынам, каб снарады даляталі да цэлі амаль адначасова.

БМП «Армата»

Гэтая цяжкая баявая машына пяхоты, паводле расейскіх вайскоўцаў, мае адзін з найлепшых узроўняў бронеабароны ў параўнанні з аналагічнымі машынамі ў іншых краінах. Баявы модуль і аддзяленне з экіпажам ды дэсантам размежаваныя. Узбраенне знаходзіцца на задняй частцы платформы. На парадзе чакаецца 10 такіх БМП.

БМП і БТР «Курганец-25»

Гэтая машына на новай сярэдняй гусенічнай платформе мае неўзабаве замяніць існуючыя БМП, БМД і БТР у расейскім войску. На гэтыя машыны плануюць устанаўліваць аўтаматычныя пушкі, кулямёты, супрацьтанкавыя ракетныя комплексы. Адна з навінак – баявы модуль, які, пасля таго, як аператар вызначыць цэль, будзе сам сам за ёй сачыць і весці абстрэл да яе знішчэння. На парадзе пакажуць па 10 БТР і БМП.

БТР «Бумеранг»

Масавыя пастаўкі ў расейскія сухапутныя войскі запланаваныя сёлета. Новы БТР створаны для транспартавання і агнявога падтрымання мотастралковага аддзялення. Узбраенне – аналагічнае, як і БТР «Круганец-25». Па Чырвонай плошчы праедуць тры адзінкі.

Эксперт: «Ніхто ж не скажа, што гэтых танкаў усяго 12»

Маскоўскі вайсковы эксперт Аляксандр Гольц бачыць у гэтай дэманстрацыі сілы толькі прапагандысцкі крок.

«Відавочна, што тыя ж хвалёныя танкі «Армата» у серыйную вытворчасць не трапяць. Спачатку дэкларавалася, што да 2020 году гэтых танкаў збяруць некалькі тысячаў. Потым – што зробяць спачатку 12, адправяць іх на пару гадоў вайскоўцам на спраўджанне і толькі потым пасля аналізу інфармацыі і водгукаў будуць прымаць рашэнне. На нармальнай мове гэта азначае, што танк у серыю не трапіць. – сцвярджае Аляксандр Гольц. – Кошт аднаго такога танку – каля 400 млн расейскіх рублёў. Гэта як кошт знішчальніка! Сённяшні асноўны танк Т-90 каштуе ледзь не ў 10 разоў менш».

Падобны лёс чакае і іншыя перспектыўныя напрацоўкі. Гольц крытыкуе адначасовае стварэнне розных відаў БТР і БМП на розных платформах.

«Гэта можа сведчыць пра няздольнасць супрацьстаяць лабістам гэтых вытворцаў, – зазначае эксперт. – Падчас параду будуць казаць, што гэтая тэхніка вось-вось трапіць у войска. Але парад дзеля таго і патрэбны – каб прадэманстраваць мілітарную моц краіны. Ніхто ж не скажа, што гэтых танкаў усяго будзе 12 штук. Гэта прапагандысцкі ход».

Зміцер Ягораў, belsat.eu

Фота mil.ru

Глядзі таксама
Каментары