Кіраўнік Беларусі Аляксандр Лукашэнка мае намер праверыць фізпадрыхтоўку афіцэраў беларускага войска.
«Трэба ўзмацніць патрабаванні да фізічнага выхавання вайскоўцаў. Таму падтрыманне добрай фізічнай формы павінна стаць паўсядзённым нормай кожнага афіцэра. І ў такой справе, вядома, важны асабісты прыклад камандзіра», – сказаўЛукашэнка падчас сустрэчы з камандным складам Узброеных сілаў, паведамляе interfax.by са спасылкай на дзяржаўнае агенцтва БелТА.
У сувязі з гэтым прэзідэнт даручыў дзяржсакратару Савету бяспекі Аляксандру Мяжуеву распрацаваць праграму, «каб я мог дзесьці праверыць нашых афіцэраў: як яны бегаюць, скачуць, кіруюць транспартам, валодаюць зброяй».
«Мы мусім у гэтым годзе паглядзець на наш афіцэрскі корпус, пачынаючы ад цэнтральнага апарату і заканчваючы канкрэтнымі падраздзяленнямі», – падкрэсліў кіраўнік дзяржавы.
Лукашэнка запэўніў, што калі ўзнікне неабходнасць ваеннай абароны дзяржавы, то пойдзе ваяваць у першых шэрагах.
«Вы мусіце ведаць: у неабдуманыя, непатрэбныя для краіны авантуры я вас ніколі не ўцягну. Але, калі давядзецца абараняць сваю зямлю і стаяць спіной да спіны, плячом да пляча, вы можаце быць упэўненыя, што мяне вы там убачыце ў першых шэрагах», – падкрэсліў лідар Беларусі.
У час наведвання Міністэрства абароны Аляксандру Лукашэнку падарылі аўтамат Калашнікава. «Добрая зброя, мая», – сказаў Лукашэнка, прыняўшы падарунак.
МЯ, паводле belta.by