Часлава Вілейта жыве ў вёсцы Ярэва на Пастаўшчыне зусім побач з літоўскай мяжой. Колькі гадоў таму яны з мужам стварылі асабістую падсобную гаспадарку «Вілейта». Але сутыкнуліся са шматлікімі перашкодамі беларускіх рэаліяў.
Гаспадарка ў Вілейтаў сапраўды вялікая: свінні, гусі, качкі, куры, козы, ну і, вядома, авечкі. З іх воўны Часлава Вілейта шые коўдры. Але каб прадаць іх, патрэбна адкрыць ІП. У гэтым мала эканамічнай выгодны – коўдры Часлава Вілейта шые ўсяго некалькі месяцаў на год.
«Воўну спачатку трэба давесці да толку. Я яе вымываю, потым расскубваю. Дзякуй Богу, у Паставах яшчэ можна воўну вычасаць», – дзеліцца Часлава Вілейта, раскладаючы воўну па насыпачным матэрыяле.
На кожную коўдру трэба каля 800 грамаў воўны. Калі пакласці больш, коўдра атрымаецца зацяжкай. «Можаце пашчупаць. І не толькі пашчупаць, а і панюхаць: няма тут ніякага паху», – з гонарам кажа гаспадыня і дадае, што каб гэтага дабіцца, прыйшлося ўкласці шмат працы.
«Авечкі ў мяне вялікія, пароды прэкас, з адной можа выйсці воўны ледзь не на дзве коўдры. Са звычайнай авечкі недзе атрымліваецца каля кілаграма воўны, а з прэкасаў амаль два», – распавядае спадарыня Часлава, пры гэтым правяраючы рукой, ці роўна насланая воўна: «Так даўней і мама рабіла, калі валёнкі валіла».
Жанчына спрытна закрывае воўну свабодным куском тканіны і паказвае, што пакуль нас чакала, начарціла крэйдай на ёй квадрацікі, каб лягчэй было коўдру потым прашыць. Ды і прыгожа ж глядзецца будзе, калі швы роўненькія!
Але для пачатку, па словах спадарыні Чаславы, коўдру трэба сфастрыгаваць, гэта значыць, прашыць вялікімі шыўкамі, каб воўна трымалася ў насыпцы. Пасля прашыўкі на машынцы фастрыгавальная нітка вымаецца.
Пакуль жанчына рыхтуе коўдру для шыцця на машынцы, яна дзеліцца сваімі праблемамі. Бяда ў тым, што яна не можа іх легальна прадаць на рынку, для гэтага патрэбна адкрываць ІП, гэта значыць станавіцца індывідуальным прадпрымальнікам.
«Ва ўсім свеце, У Польшчы, у Літве, плаціш падатак на зямлю, і ўсё, што на гэтай зямлі ты вырабляеш, ты гэта прадаеш, і больш на цябе няма ніякага падатку», – з горыччу распавядае Часлава Вілейта. Яна кажа, што магла б проста здаваць воўну, але яе нідзе не прымаюць.
Па словах жанчыны, мала таго, што ёй трэба адкрыць ІП, дык, акрамя гэтага, трэба атрымаць кучу дазволаў ад той жа санстанцыі, напрыклад: «А то я раптам людзей патраўлю, нешта не тое ў коўдру пакладу».
Але яна не бачыць яна сэнсу ў тым, каб адкрываць ІП: шые коўдры яна толькі месяцы два ў годзе, астатні час працуе на гаспадарцы, якая ў яе немалая: акрамя жывёлаў, яшчэ гектар зямлі з агародамі.
«Мне прапаноўвалі вырошчваць гародніну і прадаваць, – кажа яна, – але што на ёй заробіш? Капейкі… Трэба прадаваць прадукцыю жывёлагадоўлі, а тут усё так зарэгулявалі, столькі розных дазволаў трэба, проста сілаў не хапае», – распавядае гаспадыня.
Зараз Часлава Вілейта не мае магчымасці заплаціць падатак за зямлю, бо пенсію атрымае толькі ў снежні: «Я хачу ім прапанаваць, няхай натурай возьмуць: воўнай або гэтай коўдрай. Або чакаюць, калі я пенсію атрымаю».
Кажучы гэта, спадарыня Часлава спрактыкаванымі рухамі прашывае коўдру на машынцы. Коўдра атрымоўваецца вельмі прыгожая, цёплая, з натуральных матэрыялаў. Але, на жаль, прадаць яе ў нашай краіне так жа цяжка, як і вырабіць.
Зміцер Лупач, belsat.eu