Прадстаўнік аргкамітэту дзеля стварэння партыі “Беларускі рух” Віктар Івашкевіч папярэджаны пра недапушчальнасць дзеянняў, якія могуць быць скіраваныя на “падрыў дзяржаўнага суверэнітэту”. Папярэджанне апазіцыйнаму палітыку было вынесенае ў Генеральнай пракуратуры Рэспублікі Беларусь, куды яго выклікалі 27 сакавіка.
“Сёння а 15-й гадзіне мне прапанавалі яшчэ раз прыйсці ў пракуратуру, дзе будзе выдадзенае пісьмовае папярэджанне”, – паведаміў Івашкевіч журналістам.
Паводле палітыка, папярэджанне звязанае з ягонымі выказваннямі пра неабходнасць санкцыяў супраць беларускага рэжыму. “Я сябе не лічу вінаватым у падрыве дзяржаўнага суверэнітэту. Наадварот, дзеянні ўладаў Беларусі, іх рэпрэсіі правакуюць і падштурхоўваюць да ўвядзення супраць краіны санкцыяў. Не ад выказванняў Івашкевіча залежыць увядзенне санкцыяў, а ад паводзінаў уладаў”, – падкрэсліў Івашкевіч.
Ён таксама паведаміў, што разглядае магчымасць звароту ў пракуратуру з просьбаю ацаніць дзеянні ўладаў на прадмет падрыву дзяржаўнага суверэнітэту. “Я спытаўся ў пракуратуры, ці будуць яны разглядаць магчымыя дзеянні дзеля падрыву дзяржсуверэнітэту, калі тыя будуць зыходзіць з боку ўладаў, чыноўнікаў. Мне адказалі, што праверку могуць праводзіць у дачыненні любога грамадзяніна”, – распавёў палітык.
Нагадаем, 14 сакавіка Віктар Івашкевіч звярнуўся да ўрадаў еўрапейскіх краінаў з заклікам неадкладна ўвесці эмбарга на набыццё і транспартаванне беларускіх нафтапрадуктаў да вызвалення асуджанага апазіцыянера Сяргея Каваленкі, які трымае працяглую галадоўку і страціў больш за 30 кілаграмаў.
“Зразумела, дыктатар па добрай волі нікога не адпусціць. Значыць, яго трэба прымусіць гэта зрабіць. Прымусіць Лукашэнку выпусціць з турмы ўсіх палітзняволеных, а ў першую чаргу Сяргея Каваленку, могуць толькі рэальныя эканамічныя санкцыі – такія, як забарона ўрадамі краінаў Еўразвязу купляць і транспартаваць беларускія нафтапрадукты на іх тэрыторыі. Але для таго, каб такія санкцыі былі ўведзеныя, беларускім палітыкам, грамадскім дзеячам, усім беларусам, каго сапраўды хвалюе лёс Сяргея Каваленкі, неабходна тэрмінова, ясна і публічна запатрабаваць ад еўрапейскіх краінаў гэтыя санкцыі ўвесці. Таму я, Івашкевіч Віктар Антонавіч, сустаршыня Рады прадстаўнікоў Народных сходаў, адкрыта і публічна звяртаюся да ўрадаў еўрапейскіх краінаў з патрабаваннем неадкладнай забароны купляць і транспартаваць беларускія нафтапрадукты на іх тэрыторыі, інакш смерць Сяргея Каваленкі пакладзецца і на вашае сумленне”, – гаварылася ў звароце палітыка.
belsat.eu