Reuters: расейскія вайскоўцы з ліпеня не сумняваліся ў контрнаступе ЗСУ на Балаклію
Журналісты агенцтва Reuters знайшлі і вывучылі дакументы, якія расейскія вайскоўцы пакінулі ў сваім штабе падчас адступлення з Балакліі ў Харкаўскай вобласці. З папер вынікае, што агрэсары яшчэ з ліпеня ведалі, што ўкраінская армія пойдзе ў наступ. Горад быў вызвалены 8 верасня.
Расейскія вайскоўцы падчас адступлення з Балакліі пакінулі тысячы дакументаў, сярод іх – запісная кніжка невядомага афіцэра. Паперы знайшлі і вывучылі журналісты агенцтва Reuters. З гэтых дакументаў стала вядома, што адбывалася ў расейскім штабе, калі горад быў пад акупацыяй.
Высветлілася, што камандаваў вайскоўцамі палкоўнік Іван Папоў з 11-га армейскага корпусу Балтыйскага флоту. Ён удзельнік войнаў у Чачэніі і Грузіі.
У запісной кніжцы невядомага афіцэра занатаваны наступ украінскай арміі на вёску Гракава побач з Балакліяй 19 ліпеня. Тады расейцы былі вымушаныя адступіць, хаця камандуючы Заходняй вайсковай акругай загадваў «Гракава не здаваць». Што праўда, яны вярнулі пазіцыі, але панеслі страты: 7 вайскоўцаў загінулі, 39 – былі параненыя, 17 зніклі без звестак. А пяцярым спатрэбілася лекаванне праз «вострую рэакцыю на стрэс».
21 ліпеня палкоўнік Папоў атрымаў ад ФСБ інфармацыю, што Украіна высветліла месцазнаходжанне аднаго каманднага паста і чатырох складоў ды прывезла ў раён тры адзінкі HIMARS. Праз тры дні, 24 ліпеня, пасля ўдару HIMARS загінулі 12 расейцаў з 336-й брыгады марской пяхоты.
Праз гэтыя падзеі ў акупантаў «стаў зніжацца баявы дух і дысцыпліна», піша Reuters. Зафіксаваны выпадкі дэзерцірства і членашкодніцтва. 24 ліпеня невядомы афіцэр абразіў Арцёма Штанько, камандзіра атраду, што адступіў з Гракава. Бацька гэтага камандзіра сказаў агенцтву, што ягоны сын «адмовіўся выканаць загад аб выпраўленні сваіх людзей пад артылерыйскі агонь».
Расейскія афіцэры ўжо напрыканцы ліпеня не сумняваліся, што Украіна рыхтуе контрнаступ, падсумоўвае Reuters. Пра гэта сведчылі ў тым ліку перахопы тэлефонных размоваў.
4 жніўня ў Балаклію прыехалі вайсковыя спецыялісты ў электроніцы, яны развязвалі пытанне пра разгортванне комплексу радыёэлектроннай барацьбы дзеля перашкоды спадарожнікавай навігацыі ракетаў HIMARS. Але наступнымі тыднямі ўдары з амерыканскіх сістэмаў працягваліся, былі атакаваныя як мінімум тры расейскія камандныя пункты.
Дакументы таксама сведчаць пра недахоп вайскоўцаў і тэхнікі: на дзень 30 жніўня ў адным батальёне было 49 асобаў замест 240, брыгада рэзервістаў была ўкамплектаваная толькі на 23 %; у іх засталося два беспілотнікі з пяці, тры БТР з васьмі і чатыры супрацьтанкавых комплексаў з дваццаці чатырох.
Падчас украінскага контрнаступу 6 верасня расейскі штаб быў знішчаны з дапамогаю HIMARS. Мясцовыя жыхары кажуць, што ў выніку гэтых удараў загінулі дзясяткі расейскіх вайскоўцаў. Сведкі назвалі адступленне акупантаў хаосам: некаторыя збягалі, пакінуўшы машыны і зброю, параненыя пешшу сыходзілі з гораду.
Палкоўнік Папоў быў паранены і месяц правёў у шпіталі, паведаміла Reuters ягоная жонка. Паводле яе, ён атрымаў званне генерала і працягвае службу.
Украінскі сцяг зноў залунаў над Балакліяй 8 верасня.
Сяргей Крот belsat.eu
