«Армяне ж разумныя людзі! Там жа няма ніводнага габрэя!» – сказаў Лукашэнка журналістам у Пецярбурзе перад пасяджэннем Вышэйшага Еўразійскага эканамічнага савету. У амбасадзе Ізраілю ў Менску заявілі «Белсату», што «вывучаюць гэтую сітуацыю».
Скандальны жарт Аляксандр Лукашэнка дазволіў сабе, адказваючы на пытанні журналістаў у Санкт-Пецярбурзе, дзе 25 снежня адбылося пасяджэнне Вышэйшага Еўразійскага эканамічнага савету. Паводле расейскай газеты «Коммерсантъ», у беларускага палітыка спыталі, «ці не страцім Арменію», маючы на ўвазе рознагалоссі паміж Ерэванам і Масквою з увагі на Нагорны Карабах.
«Калі Арменія хоча памерці эканамічна, то мы яе можам страціць. Але я не думаю, што армяне дурныя людзі. Армяне ж разумныя людзі! Там жа няма ніводнага габрэя! Ведаеце чаму? Бо армяне – самыя разумныя людзі! Ну як яны кажуць», – працытавала Лукашэнку выданне.
У амбасадзе Ізраілю ў Беларусі гэтую заяву пракаментавалі «Белсату» коратка:
«На гэты момант мы вывучаем сітуацыю».
Раней Ізраіль рэагаваў на антысеміцкія закіды Лукашэнкі. Напрыклад, у 2007 годзе ён заявіў, што габрэі ператварылі Бабруйск у свінарнік. Ізраільскія ўлады вельмі рэзка пракаментавалі гэтыя словы, беларускага амбасадара выклікалі ў МЗС для тлумачэнняў.
А ў ліпені 2021 года самаабвешчаны кіраўнік Беларусі заявіў, што « увесь свет кланяецца» габрэям пасля Галакосту і баіцца ім сказаць хоць адно «няправільнае слова». Улады Ізраілю назвалі такія выказванні непрымальнымі і звярнулі ўвагу на іх антысеміцкі характар.
