На сайце Вярхоўнага Суда Беларусі з’явіўся расклад разгляду пазоваў ад Міністэрства юстыцыі наконт ліквідацыі трох беларускіх партыяў. Усе паседжанні прызначаныя на жнівень.
9 жніўня адбудзецца суд у справе ліквідацыі Сацыял-дэмакратычнай партыі народнай згоды. На 14 жніўня прызначаны разгляд пазову наконт ліквідацыі партыі БНФ, на 31 жніўня – Беларускай сацыял-дэмакратычнай грамады.
Мінюст таксама патрабуе зліквідаваць партыю «Зялёныя», Беларускую патрыятычную партыю, Рэспубліканскую партыю. Аб’яднанай грамадзянскай партыі Мінюст прапанаваў самаліквідавацца.
Акрамя таго, Міністэрства юстыцыі Беларусі адмовіла ў перарэгістрацыі Беларускай сацыял-дэмакратычнай партыі (Грамадзе). Да 11 жніўня партыя мае час, каб абскардзіць пастанову.
Перарэгістрацыю ў Беларусі прайшлі толькі тры партыі – Рэспубліканская партыя працы і справядлівасці, Ліберальна-дэмакратычная партыя і Камуністычная партыя Беларусі. Сёлета таксама была зарэгістраваная новая партыя – «Белая Русь».
Марыя Міхалевіч belsat.eu