«Зусім трохі не дайшоў». На вайне ва Украіне загінуў заснавальнік «Белага легіёну» Міраслаў Лазоўскі
16 траўня ва Украіне загінуў заснавальнік «Белага легіёну» Міраслаў Лазоўскі, яму было 49 гадоў. Ён быў адным з загінулых пад Бахмутам разам з добраахвотнікамі палка Каліноўскага. Развітанне з ім і астатнімі ваярамі адбываецца ў Кіеве 26 траўня.
«Ён сапраўдны патрыёт, змагар за свабоду Украіны і Беларусі, загінуў пад Бахмутам. Як сапраўдны камандзір, адступаў апошнім, прыкрываючы сваіх пабрацімаў, ратуючы іхныя жыцці», – распавядае пра загінулага Міраслава намеснік дырэктара «Белсату» Аляксей Дзікавіцкі.
Камандзір Міраслаў Лазоўскі разам з іншымі байцамі палка імя Каліноўскага ўдзельнічаў у баявой аперацыі ў Бахмуце. 17 траўня група трапіла пад расейскі артылерыйскі абстрэл – будынак, у якім былі добраахвотнікі, абрынуўся. Пасля гэтага была накіраваная група для дапамогі параненым і эвакуацыі целаў. Яе камандзір ахвяраваў жыццём, каб выратаваць іншых.
У той дзень загінулі пяцёра байцоў палка Каліноўскага.
Пабрацім загінулага Міраслава Лазоўскага Павел Шурмей распавёў падрабязнасці таго дня, калі загінулі беларускія ваяры: «Нашыя хлопцы далі добры бой, нанеслі страты расейцам. Яны адышлі і запыталі артылерыйскую падмогу». Паводле яго, пасля гэтага ў будынак трапілі буйныя снарады, каля 200 мм, у выніку чаго ў будынку абрынуліся тры паверхі.
Падчас «прылёту» Лазоўскі быў побач на камандна-назіральным пункце (КНП), распавядае Павел Шурмей. Калі параненыя змаглі праз рацыю распавесці, што адбываецца, ён адразу пачаў фармаваць групу дапамогі і эвакуацыі з сумежнікаў – ЗСУ, з імі быў і парамедык палка. Яны рушылі на тое месца. Лазоўскі кіраваў эвакуацыяй параненых, прыкрываў іх, выносіў зброю. Ён ішоў апошнім і зусім трохі не дайшоў да КНП.
Міраслаў Лазоўскі нарадзіўся ў Менску. У 1995 годзе ўступіў у Згуртаванне беларускіх вайскоўцаў. Быў адным са стваральнікаў «Белага легіёну» – ваенізаванай патрыятычнай арганізацыі, мэтай якой была дапрызыўная падрыхтоўка моладзі.
Алена Рувіна belsat.eu
