Праваслаўная царква Украіны 24 траўня зацвердзіла пераход на новы каляндар, перадае BBC. Раней пра такое ж рашэнне паведаміла Украінская грэка-каталіцкая царква.
Рашэнне пра пераход на новы каляндар Праваслаўная царква Украіны прыняла на Архірэйскім саборы – сходзе ўсіх епіскапаў, які адбыўся 24 траўня. Супраць пераходу прагаласаваў адзін епіскап, яшчэ адзін устрымаўся. Рашэнне яшчэ мусіць ухваліць Памесны сабор царквы 27 ліпеня 2023 года з удзелам нерэлігійных дзеячаў.
Калі рашэнне прымуць, то з 1 верасня большасць хрысціянаў Украіны могуць пачаць адзначаць рэлігійныя святы па-новаму. Раство будзе 25 снежня, а не 7 студзеня. Гэтак жа зрушацца і іншыя святы, як то Покрыва (1 кастрычніка), Хрышчэнне (6 студзеня) і Мікалая (6 снежня).
Але перанос не закране Вялікадня і некаторых іншых рухомых святаў, якія і надалей будуць адзначаць па-старому.
Якуб Хруст belsat.eu
