Чэмпіянат Беларусі страціў ужо больш за 30 замежнікаў, збольшага з эканамічных прычынаў, але ёсць і тыя, хто больш не хоча гуляць пры дыктатуры. А беларускі футбол вяртаецца на 30 гадоў назад, у 1990-ыя.
Адзін з такіх яскравых прыкладаў – украінец Станіслаў Беленькі. 23-гадовы форвард год правёў у берасцейскім «Дынама», забіў 13 галоў і стаў яго найлепшым бамбардзірам. Бачыць гульца ў Берасці хацелі і далей, нават прапанавалі новы кантракт. Але футбаліст адмовіўся і перайшоў у тбіліскае «Дынама». Свой выбар у інтэрвʼю ўкраінскаму сайту патлумачыў так:
«Запазычанасці ў заробках ёсць, але іх абяцаюць пагасіць, мяркую, усё будзе ў парадку. У Беларусі добры чэмпіянат, але прычына, праз якую я пастанавіў зʼехаць, – палітыка».
Берасцейскае «Дынама» – цікавы клуб, яшчэ год таму ён фінансаваўся Аляксандрам Зайцавым, але ў пачатку года той адмовіўся ад каманды на карысць іншага праекту – «Рух», а «Дынама» перайшло на баланс гораду, склад каманды стаў значна сціплейшы, а таксама ўзніклі праблемы з выплатамі заробкаў і прэміяльных, што цягнуліся ўвесь год і не развязаныя да сёння. Але ў гэтай гісторыі ёсць цікавы момант: улетку на гульцоў і трэнерскі штаб сталі ціснуць, каб падпісалі праўладны ліст. Трэнерскі штаб адмовіўся, але знайшліся гульцы, якія гэта зрабілі: Васіль Журневіч, Уладзіслаў Ясюкевіч, Сяргей Усеня, Павел Сядзько. У выніку гульцы «Дынама» Віталь Гайдучык і Дзмітрый Байдук палічылі немагчымым выступаць разам тымі, хто падтрымаў беззаконне і гвалт, ды сышлі з каманды.
На гэты момант «Дынама» страціла некалькі сваіх лідараў: акрамя Беленькага, гэта асноўны галкіпер Сцяпанаў і абаронца Афі.
Іншы берасцейскі клуб – «Рух» – пакуль таксама страчвае. Каманду пакінулі беларус Пячэнін, камерунец Кікі і бразілец Ўільям. Цікавы момант: паўтараецца гісторыя 1990-х, калі з беларускага чэмпіянату футбалісты ехалі ў Ізраіль. Акрамя Кікі, так ужо зрабілі славак Сёке з салігорскага «Шахцёра» і нігерыец Альфрэд са «Слуцку». І гэта толькі пачатак. Пакідае чэмпіянат і яго найлепшы бамбардзір Дэмба Дарбо: яго ўзімку «Шахцёр» купіў амаль за мільён долараў, але цяпер не можа плаціць высокіх заробкаў. А менскае «Дынама» пакідае таксама яго лідар Андрэй Бацула. Беларускія клубы ў наступным сезоне проста не здолеюць плаціць тых грошай, на якія ў нашай краіне спадзяваліся легіянеры. Фактычна кожная беларуская каманда страціла найлепшых сваіх замежнікаў. На сёння гэта ўжо больш за 30 футбалістаў. Пры гэтым замежнікі, у адрозненне ад беларусаў, кажуць усё, што думаюць, пра сітуацыю ў Беларусі. Напрыклад, 24-гадовы грузін Гіёргі Кантарыя.
Ён прыехаў у Беларусь у 19 гадоў, правёў у гарадзенскім «Нёмне» 5 гадоў і ў інтэрвʼю распавёў, як змянілася стаўленне да Лукашэнка ў Грузіі:
«Грузіны так ставіліся да Лукашэнкі, бо ён не прызнаў Абхазіі ды Паўднёвай Асеціі, падтрымаў Грузію, калі Расея ўвяла супраць краіны санкцыі. А для нас гэта вельмі важна. Але гэта было тады. Цяпер імідж Лукашэнкі змяніўся. Грузіны, прынамсі тыя, з кім я маю стасункі, глядзяць на яго ўжо зусім па-іншаму, інакш. Людзі проста не могуць зразумець, чаму ў Беларусі адбываецца тое, што мы назіраем. Моладзь хоча пераменаў, справядлівасці, але ў Беларусі дабіцца гэтага вельмі цяжка. Як можна так ставіцца да свайго народу? У Грузіі таксама бачылі тое, што рабілася пасля выбараў, як затрымлівалі людзей. Я на свае вочы бачыў гэта ў Горадні. Дзікі трэш, жах! Беларусы хочуць пераменаў, і гэта зразумела. Вырасла новае пакаленне, але 26 гадоў ва ўладзе стаіць адзін чалавек, пры гэтым палітыка не паляпшаецца, эканоміка не расце. Людзі ж, асабліва маладыя беларусы, бачаць, як жывуць у Еўропе, якая там інфраструктура, якая палітыка. Час мяняецца, народ Беларусі хоча адпавядаць тэндэнцыям. Я думаў, што ў 2020 годзе ў Беларусі адбудуцца перамены, але… Мне здаецца, што калі сёння не ўдалося нешта памяняць, то гэта не значыць, што пераменаў не будзе. Незаменных людзей няма. Беларусь – цудоўная краіна, тут выдатны народ. І ён здольны дабіцца сваёй мэты. Таму магу пажадаць вам толькі поспеху і ўсяго добрага».
Пакуль у футбаліста няма новага клубу, але гуляць ва ўмовах дыктатуры ён больш не хоча.
Усё ў беларускім футболе ідзе да таго стану, які ў кастрычніку ў інтэрвʼю «Белсату» прадказваў Аляксандр Апейкін.
«Футбол Беларусі імкліва набліжаецца да аматарскага. Гэта вынік кіравання Базанава і ўсяго кіраўніцтва БФФ за апошнія гады. Нам усім потым яшчэ доўга давядзецца выпраўляць памылкі спартовых чыноўнікаў эпохі позняга лукашызму. На спорт ужо не стае грошай. Разам з эканамічным абвалам нам трэба перажыць і значны заняпад айчыннага спорту, літаральна як у 1990-ыя. Мы ўжо амаль наблізіліся да гэтага стану ў выніках. Але гэта заканамерны этап. Так канчаюцца ўсе дыктатуры ды іх праекты», – адзначае выканаўчы дырэктар Беларускага фонду спартовай салідарнасці Аляксандр Апейкін.
АС belsat.eu