Амерыканскае выданне CNN са спасылкай на свае крыніцы паведаміла, што падчас візіту прэзідэнта Джо Байдэна ў Кіеў 20 лютага Расея правяла выпрабавальны запуск міжкантынентальнай балістычнай ракеты «Сармат».
Крыніцы CNN сказалі, што Расея загадзя апавясціла ЗША пра выпрабаванні, але яны, «падобна, праваліліся».
«Расея ўжо праводзіла паспяховыя выпрабаванні гэтай ракеты, і калі б атрымалася і гэта, то, на думку амерыканскіх афіцыйных асобаў, прэзідэнт Расеі Уладзімір Пуцін падкрэсліў бы гэта ў звароце да Федэральнага сходу ў аўторак», – піша CNN.
Тым часам Пуцін у звароце заявіў, што прыпыняе дзеянне дамовы з ЗША пра ўзаемны кантролі над ядравай зброяй – Дамовы аб стратэгічных наступальных узбраеннях.
Гісторык і палітычны аглядальнік Аляксандр Фрыдман лічыць, што такая заява наўрад ці кагосьці спужае, бо яна была прадказальнай. Ëн тлумачыць «Белсату»: яна была заключаная ў 2011 годзе, працягнутая ў 2021-м на 5 гадоў, то бок скончылася б у 2026-м. А яшчэ ў 2021 годзе і асабліва пасля пачатку поўнамаштабнай вайны ў 2022-м тэндэнцыі паказвалі, што дамова працягнутая не будзе.
Якуб Хруст belsat.eu