Дарадца Святланы Ціханоўскай у прававых пытаннях Крысціна Рыхтэр заявіла пра неабходнасць пачаць крымінальны пераслед супраць прадстаўнікоў рэжыму Аляксандра Лукашэнкі. Паводле яе, усе доказы ўжо сабраныя.
Рыхтэр адзначыла, што даклад пра становішча ў галіне правоў чалавека ў Беларусі падчас прэзідэнцкай кампаніі 2020 года і пасля яе, прэзентаваны вярхоўным камісарам у справах правоў чалавека ААН, пацвердзіў масавы дзяржаўны тэрор: забойствы, адвольныя затрыманні, здзекаванні, катаванні, утрыманне ў невыносных умовах, згвалтаванні.
Звярнула дарадца таксама ўвагу на даклад Міжнароднага камітэту расследавання катаванняў у Беларусі ў перыяд з 9 да 14 жніўня 2020 года:
«Высновы абодвух дакументаў не дазволяць проста так «перагарнуць старонку». Вінаватыя ў міжнародных злачынствах павінны панесці адказнасць за ўчыненае. А нядаўнія навіны пра выдачу Міжнародным крымінальным судом ордару на арышт Пуціна сведчыць пра тое, што ўнікнуць правасуддзя не дапамагае нават статус кіраўніка ядравай дзяржавы».
Паводле Рыхтэр, трэба прыкласці ўсе высілкі, каб прыцягнуць прадстаўнікоў рэжыму Лукашэнкі да адказнасці за злачынствы:
«Міжнароднай супольнасці варта пераходзіць ад фіксавання пагаршэння становішча з правамі чалавека ў Беларусі да рэальных дзеянняў для прыцягнення вінаватых да адказнасці. Гэта можна зрабіць шляхам разгляду фактаў супрацьпраўных дзеянняў паводле ўніверсальнай юрысдыкцыі ў судах замежных дзяржаваў або стварэння міжнароднага трыбуналу супраць службовых асобаў рэжыму Лукашэнкі за здзяйсненне злачынстваў супраць чалавечнасці».
Дарадца адзначыла, што дэмакратычныя сілы працягваюць працаваць у гэтых кірунках, «і раней ці пазней мы ўбачым вінаватых у жахлівых катаваннях на лаве падсудных».
Якуб Хруст belsat.eu