Міністэрства абароны Беларусі абвесціла, што правяранне боегатовасці арміі скончылася. Яно трывала амаль тыдзень, з 13 снежня.
Міністэрства абароны ў сваім Telegram-канале паведаміла, што ў Беларусі завяршылі правяраць боегатовасць войска. Правяранне зладзілі на даручэнне Аляксандра Лукашэнкі і праводзілі пад кіраўніцтвам дзяржаўнага сакратара Савету бяспекі Аляксандра Вальфовіча.
Пра вынікі нічога не паведамляюць.
Гэтае правяранне, якое абвесцілі раптоўным і маштабным, пачалося 13 снежня. Паводле плану, войскі «за найкарацейшыя тэрміны» мусілі вырушыць у прызначаныя раёны, наладзіць ахову і абарону, інжынернае абсталяванне, пераправы праз Нёман і Бярэзіну.
Раней у каментары «Белсату» вайсковы эксперт назваў гэтыя манеўры звычайнай армейскаю руцінаю.
Сяргей Крот belsat.eu