«Белсат» падводзіць вынікі апошніх содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 17 кастрычніка чытайце ў нашым аглядзе.
Цягам апошніх содняў не паступала паведамленняў пра актыўныя наземныя аперацыі ў паўночна-ўсходняй частцы Харкаўскай вобласці. Прарасейскі тэлеграм-канал «Рыбарь» мяркуе, што зацішша на гэтым участку фронту звязанае з падрыхтоўкай ЗСУ да наступу па лініі населеных пунктаў Кіслоўка – Катляраўка з далейшым выхадам да Ніжняй Дуванкі. Паводле крыніцы, Збройныя сілы Украіны будуць наступаць адразу з двух кірункаў: з боку Петрапаўлаўкі і Бераставога.
Пра змены ў лініі фронту ў Луганскай вобласці ніводны з бакоў канфлікту не паведамляе, у асноўным у рэгіёне трываюць пазіцыйныя баі з выкарыстаннем артылерыі. Разам з тым прарасейскі тэлеграм-канал «WarGonzo» піша пра атаку Узброеных сілаў РФ з Крэмінной у бок Зарэчнага ў Данецкай вобласці.
Больш актыўныя баявыя дзеянні праходзяць у самой Данецкай вобласці. Генеральны штаб ЗСУ паведамляе, што цягам содняў удалося адбіць расейскія атакі на ваколіцы населеных пунктаў Торскае, Спірнае, Салядар, Бахмут, Маёрск Вадзяное, Краснагораўка, Мар’інка і Новаміхайлаўка. «WarGonzo» піша пра атакі расейцаў у бок населеных пунктаў Невельскае і Пабеда. Таксама крыніца заяўляе, што ПВК «Вагнер» удалося прасунуцца на паўднёвы ўсход ад Салядару, і цяпер баі фактычна ідуць на ўсходзе Бахмуту. Мінабароны РФ паведамляе, што ЗСУ няўдала наступалі ў бок населенага пункту Страпаўка.
Між тым амерыканскі Інстытут вывучэння вайны (ISW) мяркуе, што ЗСУ надзейна ўтрымліваюць свае пазіцыі каля Бахмуту, а ўсе расейскія заявы пра поспехі на гэтым участку фронту не адпавядаюць рэчаіснасці. Імаверна, расейскія сілы ствараюць ілюзію перамогаў хоць на якім з участкаў фронту.
У Запарожскай вобласці Збройныя сілы Украіны вядуць пазіцыйную абарону і ўзмацняюць групоўку сваіх войскаў. «Рыбарь» піша, што камандаванне ЗСУ рыхтуецца да расейскага наступу на Запарожжа з далейшым перасячэннем Дняпра і выхадам да Нікапалю.
На паўночным участку фронту ў Херсонскай вобласці ўкраінскія сілы працягваюць наступаць у кірунку Мылавога, Мінабароны РФ гаворыць пра адбіццё ўкраінскай атакі на населены пункт Брускінскае Берыслаўскага раёну. ЗСУ таксама намагаюцца прасунуцца ў бок самога Херсону, асабліва па лініі трасы М-14. Але пра змены ў лініі фронту пакуль ніводны з бакоў канфлікту не паведамляе.
Тым часам «WarGonzo», спасылаючыся на свае крыніцы, піша, што ЗСУ неўзабаве плануюць ажыццявіць маштабны контрнаступ на Херсон, дзеля чаго цяпер у Мікалаеве назапашваецца жывая сіла і тэхніка. Пры гэтым гаворка вядзецца і пра вялікую колькасць вайскоўцаў з краінаў NATO, у прыватнасці, з тэрыторыі Францыі.
Ноччу і ранкам 17 кастрычніка Збройныя сілы Расеі ў чарговы раз нанеслі масіраваны ўдар па мірных гарадах Украіны: пацярпела ўкраінская сталіца, Сумская, Вінніцкай, Хмяльніцкая, Жытомірская, Днепрапятроўская, Запарожская і Мікалаеўская вобласці. Былы міністр бароны так званай «ДНР» Ігар Гіркін ў сваім тэлеграм-канале назваў гэта «ударами возмездия».
Генштаб ЗСУ піша, што цягам содняў удалося знішчыць каля 320 расейскіх вайскоўцаў, такім чынам агульныя беззваротныя страты РФ дасягнулі 65 320 тысяч асобаў.
ВК belsat.eu