У Беларусі 17 ліпеня пачынаецца асноўны этап уступнай кампаніі ў вышэйшыя навучальныя ўстановы. Ён працягнецца да 25 ліпеня.
Фота мае ілюстрацыйны характар. Крыніца: ptoday.ru
Тэрміны правядзення ўступнай кампаніі ў 2023 годзе былі вызначаныя пастановай Міністэрства адукацыі № 155 ад 12 траўня 2023 года.
Дакументы ад абітурыентаў будуць прымацца:
- з 17 да 25 ліпеня – у дзяржаўных навучальных установах за кошт бюджэтных сродкаў і на платнай аснове;
- з 17 да 27 ліпеня – на дзённай форме навучання на кірунках адукацыі «Сельская гаспадарка», «Ветэрынарыя», «Рыбная гаспадарка» і «Ахова працы» (за кошт бюджэтных сродкаў і на платнай аснове) і на ўсіх спецыяльнасцях у Вайсковай акадэміі Рэспублікі Беларусь і Інстытуце памежнай службы Рэспублікі Беларусь, а таксама на вайсковых факультэтах і вайсковым інстытуце без права юрыдычнай асобы ва ўстанове вышэйшай адукацыі за кошт бюджэтных сродкаў;
- з 15 лістапада да 5 снежня – на завочную форму атрымання адукацыі ў навучальных установах сельскагаспадарчага профілю за кошт бюджэтных сродкаў і на платнай аснове.
Ахвочыя вучыцца на платнай аснове могуць падаць дакументы ў наступныя тэрміны:
- з 17 ліпеня да 3 жніўня – у Акадэміі МУС, Магілёўскі інстытут МУС, Універсітэт грамадзянскай абароны МНС;
- з 17 ліпеня да 10 жніўня – на дзённую форму атрымання адукацыі на сельскагаспадарчых спецыяльнасцях;
- з 17 ліпеня да 9 жніўня – у іншыя ВНУ;
- з 15 лістапада да 5 снежня – на завочную форму навучання ў адукацыйных установах сельскагаспадарчага профілю.
Агляд
Кошты на навучанне ў ВНУ выраслі. Вучыцца ў Беларусі даражэй, чым у суседніх краінах
2023.07.14 15:32
З 17 да 19 ліпеня вызначаны тэрмін падачы дакументаў для выпускнікоў:
- профільных класаў педагагічнай накіраванасці, спартова-педагагічнай накіраванасці пры ўмове паступлення на педагагічныя, спартова-педагагічныя спецыяльнасці;
- тых, якія засвоілі змест адукацыйнай праграмы дадатковай адукацыі адораных дзяцей і моладзі падчас вучобы ў Нацыянальным дзіцячым тэхнапарку і пры ўмове паступлення на спецыяльнасці профіляў адукацыі «Тэхніка і тэхналогіі», «Натуральныя навукі».
Вызначаныя наступныя тэрміны правядзення ўступных іспытаў:
- з 26 да 28 ліпеня – ва Універсітэце грамадзянскай абароны МНС;
- з 28 да 29 ліпеня – на вайсковым факультэце Гарадзенскага дзяржаўнага ўніверсітэту ім. Я. Купалы;
- з 26 ліпеня да 2 жніўня – у іншых ВНУ;
- з 28 ліпеня да 2 жніўня – на дзённую форму навучання на сельскагаспадарчых спецыяльнасцях;
- з 6 да 15 снежня – на завочную форму навучання ў ВНУ сельскагаспадарчага профілю.
Тэрміны залічэння абітурыентаў на навучанне за кошт бюджэту:
- да 30 ліпеня – у Вайсковай акадэміі РБ, Інстытуце памежнай службы РБ, Універсітэце грамадзянскай абароны МНС, на вайсковых факультэтах у ВНУ;
- да 4 жніўня – у іншых дзяржаўных ВНУ (акрамя завочнай формы навучання ў ВНУ сельскагаспадарчага профілю);
- да 20 снежня – на завочную форму навучання ў ВНУ сельскагаспадарчага профілю.
Залічэнне на платнае навучанне адбудзецца:
- да 11 жніўня – ва ўсе ВНУ, акрамя завочнай формы ВНУ сельскагаспадарчага профілю;
- да 20 снежня – на завочную форму ў ВНУ сельскагаспадарчага профілю.
Марыя Міхалевіч belsat.eu
