У абаронным ведамстве кажуць, што комплекс захадаў для рыхтавання Узброеных сілаў трывае. Таксама адбываецца перамяшчэнне падраздзяленняў на паўднёвыя рубяжы з мэтаю ратацыі.
У Міністэрстве абароны паведамляюць, што для правядзення практычных заняткаў па агнявым, тактычным і спецыяльным рыхтаванні задзеяныя палігоны «Берасцейскі», «Гожскі», «Чапелева», «Даманаўскі», «Абуз-Лясноўскі», «Ружанскі», «Лосвіда».
У інфармацыі ведамства не ўдакладняецца, калі і як доўга будуць трываць заняткі.
Нагадаем, што ўначы 16 сакавіка жыхары шэрагу гарадоў на поўдні Беларусі чулі гукі выбухаў. Праўладныя тэлеграм-каналы патлумачылі гэта планавымі вучэннямі. Аднак выбухі чулі нават у гарадах далёка ад вайсковых палігонаў.
Мінабароны таксама паведамляе, што сіламі рэагавання з органамі памежнай службы ажыццяўляецца ўзмацненне аховы дзяржаўнай мяжы. Часткі ВПС і войскаў СПА выконваюць задачы ўзмоцненым складам. Акрамя таго, з мэтаю змены падраздзяленняў на паўднёвых рубяжах «часткаю сілаў здзяйсняецца перамяшчэнне камбінаваным спосабам ва ўстаноўленыя раёны». На мінулым тыдні, 12 сакавіка, Генеральны штаб Беларусі ўжо папярэджваў, што бліжэйшым часам плануецца ажыццявіць замену пяці батальённа-тактычных групаў на мяжы з Украінаю.
Міністэрства абароны падкрэслівае: «ніякія захады мабілізацыі ў Рэспубліцы Беларусь не праводзяцца».
РР belsat.eu
