З сектару Газа эвакуявалі беларусаў і членаў іх сем’яў, паведамляе Telegram-канал «Глас МИДа». У Егіпет з тэрыторыі анклава трапілі 43 асобы.
Як паведамляецца, выхад людзей з сектару Газа «беларускі бок зладзіў у кантакце з калегамі з Ізраілю і Егіпта, а таксама пры садзейнічанні Расеі і Катара».
«На цяперашні момант 43 асобы прайшлі праз памежны пераход «Рафах» на тэрыторыю Егіпта. У бліжэйшы час чакаецца іх вяртанне на радзіму», – піша Telegram-канал «Глас МИДа», які звязваюць з прэс-сакратаром міністэрства Анатолем Глазам.
Сёння дарадца кіраўніка МНС Расеі Данііл Мартынаў паведамляў пра планы эвакуяваць з Газы 48 беларусаў, чыя імёны былі ў адмысловым пераліку. Іх разам з расейцамі выправяць у Маскву самалётам.
Раней выданне «Sputnik» пісала, што агулам у палестынскім анклаве знаходзяцца «некалькі дзясяткаў беларусаў, з большага – жанчыны з дзецьмі».
Сітуацыя ў сектары Газа абвастрылася пасля нападу баевікоў «Хамасу» на Ізраіль 7 кастрычніка. У адказ габрэйская дзяржава распачала маштабную вайсковую аперацыю, ААН кажа пра «гуманітарную катастрофу» у анклаве.
Сцяпан Кубік belsat.eu