Аўтацэнтр «Audi» мае паўстаць на месцы лесапаласы ў мікрараёне Уручча. Тэрыторыю ўжо рыхтуюць да будаўніцтва, урачыста заклаўшы памятную капсулу.
«Я як грамадзянін Беларусі нічога супраць пабудовы аўтацэнтраў кампаніі «Audi AG» на тэрыторыі Беларусі не маю. Але я супраць высякання 150–200 амаль стогадовых дрэваў», – піша ў звароце Вячаслаў Піліпук. На ягоную думку, без зялёнай паласы значна пагоршацца экалагічныя ўмовы ў ваколіцах.
Вячаслаў Піліпук просіць спыніць ссяканне дрэваў, адрадзіць пладародны слой зямлі ды пасадзіць на гэтым месцы новыя дрэвы. Паводле менчука, гэта «дазволіць вярнуць рэпутацыю» канцэрну. «Калі высяканне працягнецца, я прымаю рашэнне: прынцыпова ніколі не купляць аўты аўтаканцэрну «Audi AG» і дзяліцца гэтым рашэннем са сваймі нашчадкамі ды атачэннем», – гэтымі словамі жыхар Уручча завяршае свой зварот.
МЛ, belsat.eu
