Міністэрствы замежных справаў Латвіі, Літвы і Эстоніі выклікалі прадстаўнікоў расейскіх амбасадаў і ўручылі ім ноты пратэсту пасля абвяшчэння Расеяй у вышук палітыкаў і дэпутатаў краінаў Балтыі.
13 лютага выданне «Медыязона» паведаміла, што ў базе расейскага МУС ёсць карткі вышуку на прэм’ер-міністра Эстоніі Каю Калас, міністра культуры Літвы Сіманаса Кайрыса, а таксама на сотню іншых чыноўнікаў і палітыкаў з Усходняй Еўропы. Сярод іх дзве траціны мінулага склікання Сейму Латвіі, дэпутаты гарадскіх саветаў Рыгі, Клайпеды і Вільні, Луцку і Роўна, а таксама мэр польскага гораду Вальбжых і намеснік міністра дзяржаўных актываў Польшчы.
Супраць гэтых людзей у Расеі заведзеныя крымінальныя справы пасля зносу савецкіх манументаў.
Латвійскае МЗС папрасіла часовага паверанага ў справах Расеі Алега Зыкава даць тлумачэнні наконт «палітычна матываваных абвінавачанняў», якія расейскія ўлады выставілі «былым і цяперашнім латвійскім палітыкам».
У МЗС Літвы прадстаўніку Расеі Аляксандру Елкіну ўручылі «ноту строгага пратэсту» праз абвяшчэнне ў вышук літоўскіх палітыкаў.
«Рашэнні Расейскай Федэрацыі супярэчаць агульнапрызнаным нормам міжнароднага права, дэманструюць высілкі для фальсіфікацыі мінулага і непавагу да гістарычнай памяці Літвы. МЗС Літвы запатрабавала неадкладнага спынення палітычна матываванага пераследу літоўскіх грамадзянаў», – паведамляецца ў прэс-рэлзіе літоўскага МЗС.
У эстонскім МЗС часоваму паверанаму ў справах Расеі Ленару Самігуліну «выказалі абурэнне» праз абвяшчэнне ў вышук прэм’ер-міністра краіны Каі Калас і дзяржсакратара Эстоніі Таймара Пэтэркопа. У ведамстве зазначылі, што «гэтыя крокі Расеі не перашкодзяць Эстоніі рашуча падтрымліваць Украіну».
Марыя Міхалевіч belsat.eu