Еўразійскі банк развіцця раскрыў сакрэт павелічэння міжнародных рэзерваў Беларусі
Еўразійскі банк развіцця растлумачыў, чаму ў студзені выраслі міжнародныя рэзервы Беларусі. У прыватнасці, гэтаму паспрыяла падаражэнне золата на сусветным рынку, гаворыцца ў справаздачы банку. Беларускі Нацыянальны банк з леташняга жніўня не тлумачыць, чаму мяняюцца золатавалютныя рэзервы краіны, і хавае іх структуру.
У штотыднёвым макрааглядзе аналітыкаў Еўразійскага банку развіцця гаворыцца, што ў студзені золатавалютныя рэзервы Беларусі павялічыліся на 200 мільёнаў долараў і на 1 лютага склалі 8,1 мільярда долараў.
«Павелічэнню рэзерваў спрыяў рост сусветных цэнаў на золата (на 6 % за перыяд з 31 снежня да 31 студзеня), а таксама купля Нацыянальным банкам замежнай валюты на ўнутраным рынку», – адзначаюць аналітыкі ЕАБР.
На мінулым тыдні Нацыянальны банк Беларусі паведаміў, што міжнародныя рэзервы краіны дасягнулі амаль 8,143 мільярда долараў. Яны растуць пяць месяцаў запар, з леташняга кастрычніка.
Ужо паўгода рэгулятар не раскрывае структуры рэзерваў і фактараў, што ўплываюць на іх змены, паведамляючы толькі пра агульную суму дзяржаўнага скарбу.
Паводле прагнозаў уладаў, на 1 студзеня 2024 года золатавалютныя рэзервы мусяць скласці не меней за 6 мільярдаў долараў. Такім чынам, Нацбанк не выключае, што сёлета актывы скароцяцца на 2 мільярды.
Сяргей Крот belsat.eu
