Міжнароднае апытанне: 72 % рэспандэнтаў у 36 краінах лічаць Расею пагрозай свету
Выданне U.S. News & World Report падае вынікі міжнароднага апытання, праведзенага ў 36 краінах розных рэгіёнаў свету. Большасць з тых, хто адказваў на пытанні анкеты, назвалі Расею глабальнай пагрозай.
Са сцвярджэннем, што «Расея ёсць пагрозай свету» пагадзіліся 72 % рэспандэнтаў. 66 % апытаных тое самае сказалі пра Кітай, 50 % пагрозай лічаць ЗША.
У Фінляндыі, Польшчы, Даніі і Японіі Расею назвалі пагрозай свету больш за 90 % удзельнікаў даследавання.
Адначасова найлепшымі краінамі большасць рэспандэнтаў назвалі Швейцарыю, Канаду, Швецыю, Аўстралію і ЗША. Расея ў гэтым спісе на 37-м месцы. У 2022 годзе яна займала 36-е месца, адразу ўпаўшы на 12 радкоў – гэта стала рэкордным абвалам у гісторыі даследаванняў U.S. News & World Report.
Украіна за год апусцілася на 6 радкоў і цяпер на 68-м месцы.
67 % апытаных заявілі, што іхныя краіны павінны падтрымліваць Украіну. Гэта на 5 % менш, чым летась.
Апытанне «Найлепшыя краіны» праводзілася з 17 сакавіка да 12 чэрвеня. Рэспандэнтам прапанавалі ацаніць 87 краінаў на падставе 73 характарыстык, сярод якіх клопат пра правы чалавека, магутнасць арміі, удзел у моцных міжнародных альянсах, культурны ўплыў, адкрытасць для бізнесу, якасць жыцця і грамадскі дабрабыт.
Ужо другі год запар гэтае апытанне не праводзіцца ў Расеі.
Марыя Міхалевіч belsat.eu
