Міністэрства замежных справаў Кубы выступіла з заявай у сувязі з выяўленымі спробамі Расеі вербаваць грамадзянаў гэтай краіны на вайну супраць Украіны.
У МЗС Кубы паведамілі, што мясцовыя праваахоўнікі выявілі і працуюць над нейтралізацыяй і ліквідацыяй сеткі гандлю людзьмі, якая дзейнічае з Расеі, з мэтай уключэння кубінскіх грамадзянаў, якія там пражываюць, і нават тых, хто жыве на Кубе, у склад Збройных сілаў, якія ўдзельнічаюць у ваенных аперацыях ва Украіне.
«Спробы такога кшталту былі нейтралізаваныя, а супраць датычных да гэтай дзейнасці пачатыя крымінальныя справы», – заявілі ў ведамстве.
У МЗС падкрэслілі, што рашуча не прымаюць вайну ва Украіне.
«Куба не ўдзельнічае ў вайне ва Украіне. Яна дзейнічае і будзе рашуча дзейнічаць супраць тых, хто на тэрыторыі краіны ўдзельнічае ў любой форме гандлю людзьмі ў мэтах наёмніцтва ці вербаванне, каб кубінскія грамадзяне маглі ўзняць зброю супраць любой краіны», – адзначылі ў міністэрстве.
Пра вербаванне грамадзянаў Кубы на вайну з Украінай раней паведамлялі расейскія медыі. Гэтак, «Рязанские ведомости» адзначалі ў траўні, што «з пункта адбору на вайсковую службу паводле кантракту скіраваліся служыць у расейскую армію некалькі грамадзянаў Рэспублікі Куба».
«Паводле іх слоў, кубінцы хочуць дапамагчы нашай краіне выконваць задачы ў зоне правядзення спецыяльнай ваеннай аперацыі, і некаторыя з іх у далейшым хацелі б стаць грамадзянамі Расеі», – пісала выданне.
Поўнамаштабная вайна паміж Расеяй і Украінай цягнецца ўжо паўтара года. За гэты час сукупныя страты РФ ва Украіне могуць набліжацца да 300 тысячаў чалавек: 120 тысячаў загінулых і 170–180 тысячаў параненых. Гэта пакуль самая высокая лічба загінулых і параненых акупантаў, якую прыводзяць незалежныя крыніцы.
Якуб Хруст belsat.eu
