3 сакавіка Тадэвуша Кандрусевіча адпусцілі дадому са шпіталя. Там яму выдалілі пухліну. Партал Catholic.by апублікаваў зварот іерарха з нагоды ягонай выпіскі.
«Калі з вуснаў лекараў-анколагаў пачуў дыягназ «меланома», то, усведамляючы сур’ёзнасць хваробы … даверыў сябе Богу і маліўся аб здароў’і, але пры гэтым згаджаўся з Божай воляй», – так пачынаецца ліст арцыбіскупа Тадэвуша Кандрусевіча.
Ён падзякаваў Богу за паспяховы курс лячэння, а лекарам – за іхны прафесіяналізм і ахвярнае служэнне хворым.
«Словы ўдзячнасці кірую беларускім біскупам, святарам, кансэкраваным асобам, вернікам і людзям добрай волі за малітвы і салідарную падтрымку. Дзякую тым, хто маліўся за мяжою і ўспамагаў у гэты час новых выпрабаванняў».
Кандрусевіч выказаў надзею, што хутка вернецца да пастырскага служэння людзям.
Хваробу ў арцыбіскупа знайшлі падчас медычнага абследавання. Аперацыю яму зрабілі 8 лютага.
Сяргей Крот belsat.eu