Сябрамі арганізацыі «Ахова птушак Бацькаўшчыны» птушкай наступнага года выбрана белая сініца, пеўчая птушка, якая жыве ў Беларусі толькі на Палессі. Яна змяніла леляка – птушку 2021 года.
Да гэтага белая сініца перамагла ў анлайн-галасаванні, у якім мог удзельнічаць любы чалавек. Так яна стала адной з трох кандыдатак на званне птушкі года, астатнімі былі скапа і звычайная туркаўка. Усяго прагаласавала 643 чалавекі.
Белая сініца – від уключаны ў Чырвоную кнігу, а колькасць іх у Беларусі апошні раз ацэньвалася ў 2015 годзе ўсяго ў 500-800 пар.
Гняздуе птушка ў Беларусі і Украіне толькі ў Палессі і нават узімку не пакідае яго. Птушкі канцэнтруюцца вакол Прыпяці і на яе прытоках, дзе ўтвараюць ізаляваную папуляцыю. Для гнездавання птушцы патрэбны дубровы і старыя вербалозы, якія ўвесну заліваюцца вадой падчас паводкі. Таму менавіта вакол Прыпяці птушкі і жывуць і нідзе болей на захад, поўнач ці поўдзень.
Цяпер жа асноўныя пагрозы для белай сініцы – меліярацыя пойм палескіх рэк і забалочаных лясоў, веснавыя палы ў поймах. Яшчэ адна з пагроз – недахоп месцаў гнездавання праз вырубку старых дрэў, акрамя таго, шмат птушанят гіне ў гнёздах, якія недастаткова абаронены ад драпежнікаў.
Нацыянальную кампанію «Птушка года» АПБ праводзіць з 2000 года, каб прыцягнуць увагу людзей да дзікіх птушак Беларусі іх праблемаў і неабходнасці захавання тых месцаў, дзе яны жывуць.
АД, belsat.eu
