Дэпутат Дзярждумы ад Свярдлоўскай вобласці Максім Іваноў распавёў выданню «ЕАН» пра смерці мабілізаваных у навучальным цэнтры Мінабароны ў мястэчку Ялань. Адзін з іх учыніў суіцыд.
Максім Іваноў паведаміў, што адзін мабілізаваны скончыў жыццё самагубствам, другі памёр ад прыступу, трэцяга «спісалі і адправілі дадому, дзе ён адразу сканаў ад цырозу вантробы».
Упаўнаважаная па правах чалавека ў Свярдлоўскай вобласці Таццяна Мерзлякова выданню «E1.RU» удакладніла, што ў мужчыны, які памёр ад прыпадку, здарыўся эпілептычны прыступ праз алкагольнае атручванне.
Міністэрства абароны Расеі гэтыя выпадкі ніяк не каментавала.
Мабілізацыю абвясцілі ў краіне 21 верасня. Міністр абароны Расеі Сяргей Шайгу запэўніваў, што ў войска забяруць 300 тысяч чалавек. Але ўлады засакрэцілі пункт указа, дзе гаворыцца пра дакладную колькасць асоб, якіх мабілізуюць.
Тым часам на расейскім урадавым партале «Объясняем.рф» з’явілася інфармацыя, што мабілізацыя бестэрміновая, яе можа прыпыніць толькі прэзідэнт.
Сяргей Крот belsat.eu