«Участковы паведаміў, што нібы сігнал майго мабільнага тэлефона быў зафіксаваны станцыяй мабільнага аператара ў тым раёне, дзе праходзіў мітынг, – распавядае Вераніка. – Ён гэта казаў, але ў пратаколе гэтага не было адлюстравана, у пратаколе папросту напісалі тэзісна, што я прымала ўдзел, парушала парадак правядзення масавых мерапрыемстваў».
Пасля гэтай размовы з міліцыянтам дзяўчыну затрымалі за ўдзел у акцыі пратэсту 4 кастрычніка.
«Пасля некалькі гадзінаў я правяла ў дзяжурнай частцы РУУСу, чакала канвой, транспарт, каб мяне завезлі на Акрэсціна. Цікавы факт – мяне даставілі на велізарным пасажырскім аўтобусе, на якім ехалі толькі я і мой канваір».
На наступны дзень над Веранікаю адбыўся суд.
«Адвакат прыводзіў вельмі шмат аргументаў, што маё затрыманне з’яўляецца незаконным, таму што мая віна не даказаная. На жаль, суд нагадваў нейкае мерапрыемства для птушкі».
Вераніку Гацко пакаралі штрафам: 30 базавых велічынь. Яна працуе ў ІТ-сферы. Шмат ейных калегаў былі вымушаныя з’ехаць з краіны.
«У мяне была магчымасць з’ехаць, але я засталася і планую заставацца. Аднак калі я буду адчуваць, што ўсё толькі пагаршаецца і няма ніякага святла пры канцы тунэлю, то я, канечне, з’еду з Беларусі».
Наступную нашую гераіню – Гуліко Махнадзе – затрымалі 10 жніўня ў цэнтры Менску.
«Мяне білі па галаве. Пасля без заезду ў РУУС, без афармлення, без тлумачэння маіх правоў і абавязкаў, без тэлефанавання адвакатам, сваякам завезлі ў ЦІП».
Пасля вызвалення з Акрэсціна спадарыня Гуліко неаднаразова звярталася са скаргамі на дзеянні сілавікоў.
«Мне прыйшоў адказ з Менгарвыканкаму аб тым, што з АМАПам мы наагул не бачыліся. Ні 10, ні 12 жніўня. Вельмі цікавы факт, які весяліць мяне. Мяне абвінавацілі, уся доказная база суда базавалася на тым, што мяне затрымалі амапаўцы на мітынгу і аформіў участковы. А амапаўцы кажуць: «Не, мы не затрымлівалі!»
14 лістапада Гуліко праз Telegram патэлефанаваў незнаёмец. У яе атрымалася запісаць гэтую размову:
– Ты мяне на Нямізе здымала?
– На Нямізе я шмат каго здымала.
– Пад царквою я цябе пачаў шчаміць.
– Ты пачаў мяне шчаміць? А калі гэта было?
– Табе зрабіць манікюр?
– Манікюр? Навошта мне манікюр?
Спадарыня Махнадзе зразумела, што яна размаўляла з прадстаўніком АМАП ГУУС Менску Яўгенам Сяргеевічам Савічам. Гэта, меркавана, той самы амапавец, які ў часе паслявыбарчых пратэстаў пагражаў затрыманаму падлетку гранатай.
Адвакат Менскай гарадской калегіі Міхаіл Макараў раіць Гуліко Махнадзе звярнуцца са скаргаю ў праваахоўныя інстанцыі.
«У выпадку, калі вы турбуецеся, што праваахоўныя органы не могуць належным чынам разабрацца або выявіць асобу, якая чыніць пагрозы, тэхнічны прагрэс можа дапамагчы знайсці гэтую асобу іншым спосабам. У любым выпадку трэба звяртацца ў праваахоўныя органы. І важна ўсё гэтае фіксаваць», – падсумоўвае юрыст.
Праваабарончую праграму «Маю права» глядзіце кожную пятніцу а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.