Герой праграмы «Маю права» – вакаліст культавага гомельскага гурта «Gods Tower» Уладзіслаў Наважылаў (сцэнічная мянушка Lesley Knife).
«Я проста не вытрымаў бы гэтую «хімію». Апошні самы яскравы прыклад – тое, што адбылося з Дзмітрыем Дудойцем. Яму далі два гады, сядзеў ён, сядзеў, і скончылася тым, што ён проста скочыў з маста», – кажа Уладзіслаў.
У 2020 годзе Наважылаў разам з Аляксандрам Памідоравым адбыў адміністратыўны арышт за ўдзел у дваровым канцэрце.
«Мы былі з Памідорам у турме. Турма – гэта турма, ты проста ў чатырох сценах, цябе ізалявалі ад астатняга сусвету, ты не ведаеш, што адбываецца, і ты сядзіш і падпарадкоўваешся камандам тых дурняў, што там ходзяць у форме. Усё!»
Уладзіславу Наважылаву прысудзілі тры гады «хатняй хіміі» за крытычныя выказванні аб старшыню Гомельскага аблвыканкаму Генадзю Салаўю. Беларускія суды забыліся, што 33-і артыкул Канстытуцыі Беларусі гарантуе кожнаму грамадзяніну права свабодна выказваць свае думкі ды перакананні.
Музыка распавёў нам сваю цікавую гісторыю, як з дапамогай ініцыятывы «BySol», яму ўдалося збегчы ва Украіну, а потым у Літву.
Ён у гумарыстычных фарбах апісвае час, праведзены ў чаканні пераходу мяжы:
«На гэтай «блатхаце», канспіратыўнай кватэры, мне давялося сядзець 8 дзён. Я глядзеў расейскія дэпрэсіўныя серыялы, я аблазіў увесь інтэрнэт, але рабіў гэта «інкогніта». А яшчэ там была вельмі нясмачная ежа! Я нават хацеў кінуць есці наогул!»
Жарты жартамі, але, апынуўшыся ў Літве, Уладзіслаў чакае віду на жыхарства.
«Цяпер я знаходжуся ў стане чакання. У траўні, у самым горшым выпадку, у мяне будзе гэтае ВНЖ. Але гэта не вельмі камфортна, бо ўзнікаюць пэўныя праблемы з працай, напрыклад. Не ўсё так празрыста і не ўсё так лёгка», – кажа Наважылаў.
Нашая экспертка з грамадскай арганізацыі «Дапамога» Наталля Калегава тлумачыць, якім чынам беларусам можна законна трапіць на тэрыторыю Літвы, што трэба зрабіць, каб атрымаць доўгатэрміновую візу, працаўладкавацца, легалізаваць дакументы аб адукацыі і атрымаць від на жыхарства ў Літве.
«Бежанства – гэта сур’ёзны крок. Верагодна, некаторыя яго палохаюцца… Часовы від на жыхарства – гэта такі ж самы прытулак, толькі часовы па дакументах», – сцвярджае спадарыня Калегава.
Каб легалізаваць беларускія дыпломы, са словаў эксперткі, не трэба рабіць апастылю, а трэба звярнуцца ў Цэнтр сертыфікацыі www.skvc.lt. Адправіць туды дакументы, якія будуць разгледжаныя на працягу 20 дзён, і атрымаць верыфікаваны, свой абноўлены беларускі дыплом – прыведзены да літоўскага і еўрапейскага стандартаў.
Праваабарончую праграму «Маю права» глядзіце кожную пятніцу а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы»на нашай старонцы.