Журналістам уплывовага расейскага выдання «Коммерсант», якія 20 траўня абвясцілі аб сыходзе з выдання на знак пратэсту супраць звальнення калегаў, заблакавалі пропускі ў рэдакцыю.
Пра гэта напісала ў «Facebook’у» намеснік загадчыка аддзелу палітыкі Марыя-Луіза Тырмастэ – яна таксама сыходзіць з выдання.
Журналісты напісалі заявы аб звальненні з 15 чэрвеня. Паводле РБК, журналістам таксама заблакавалі доступ да ўліковых запісаў на іхных працоўных кампутарах.
Былы спецкор выдання Алесь Герасіменка паведаміў, што ўсіх вывелі з будынку пад аховай.
У сваю чаргу галоўны рэдактар і гендырэктар «Коммерсант» Уладзімір Жэлонкін заявіў «Новой газете», што гаворка ідзе «пра стандартную працэдуру падчас звальнення».
«Якая праблема? Яны могуць атрымаць доступ у памяшканне па часовых пропусках», – прыводзіць выданне словы гендырэктара.
20 траўня стала вядома, што з выдання сышлі два журналісты – Іван Сафронаў і рэдактар Максім Іваноў. Паводле журналістаў, прычынаю звальнення стаў артыкул пра магчымую адстаўку спікера Савета Федэрацыі Валянціны Мацвеенка. На знак пратэсту супраць рашэння акцыянера з «Коммерсант» звольніўся ў весь аддзел палітыкі. Звольненыя журналісты выступілі са зваротам да чытачоў, у якім заявілі, што «гаворка ідзе пра наўпроставы ціск на журналістаў».
ЮВ belsat.eu
