Аляксандр Лукашэнка прызначыў Аляксандра Мароза генеральным дырэктарам ААТ «Менскі механічны завод імя С. І. Вавілава» – кіроўная кампанія холдынгу БелОМА. Ён запатрабаваў ад новага кіраўніка ўжо да канца года дамагчыся добрых вынікаў дзейнасці холдынгу.
Лукашэнка падкрэсліў: «Калі трэба – кажыце, чым дапамагчы. Прыязджайце ў Міністэрства прамысловасці, стаўце ім задачы ад майго імя. Вынік павінен быць. Гэта добрае прадпрыемства, дзе можна працаваць і атрымліваць вынікі».
Таксама Лукашэнка распавёў, за што не так даўно затрымалі генеральнага дырэктара гэтага холдынгу.
«Уся эканоміка – ад продажаў гатовай прадукцыі, ад кошту гэтай прадукцыі. Яны прыніжалі кошт, наколькі я памятаю гэтую крымінальную справу. Там прыніжалі цану на ваш тавар, а розніцу дзялілі паміж спажыўцом у Расеі і частку клалі сабе ў кішэню», – цытуе Лукашэнку ягоная прэс-служба.
Пра затрыманне гендырэктара холдынгу «БелОМА» Вячаслава Бурскага і ператрусы на прадпрыемстве паведаміў 1 лютага belsat.eu. У БелОМА сітуацыю спачатку не каментавалі. 6 лютага генеральны пракурор Беларусі Аляксандр Канюк пацвердзіў затрыманне Бурскага. «Так, затрыманы. Але гэта чалавек, там сям’я, трэба разабрацца», – адзначыў Канюк у каментары TUT.by.
Telegram-канал «Хромой бес» паведамляў, што сілавікі таксама затрымалі дырэктара БелОМА «па камерцыі» Уладзіміра Кіскіна.
ІІ, belsat.eu
