ВНУ карэктуюць расклад заняткаў і пераводзяць лекцыі на дыстанцыйны рэжым

Універсітэты ў Менску распачалі карэктаванне раскладу і пераводзяць лекцыі ў дыстанцыйны рэжым. З мэтай прафілактыкі распаўсюду каронавірусу некаторыя ВНУ адмаўляюцца ад лекцыяў, піша БелТА.

Першай на дыстанцыйныя лекцыі перайшла Акадэміі кіравання пры прэзідэнце. Дыстанцыйна праводзяцца і некаторыя іншыя заняткі.

«Мы прыкладаем усе намаганні, каб гэта ніяк не адлюстравалася на якасці навучання. Да выкладчыкаў прад’яўляюцца павышаныя патрабаванні з нагоды кантролю. Студэнты даюць справаздачу па адпрацаванні кожнага элементу курсу», – распавёў першы прарэктар Валер Барадзеня.

Акрамя таго, у гэтай ВНУ адмянілі масавыя мерапрыемствы, у тым ліку і некаторыя канферэнцыі.

У БДУ на ўсіх факультэтах пераносяць лекцыі. Пры гэтым у ВНУ не разглядаецца ўвядзенне дыстанцыйнага навучання.

У шэрагу ВНУ абмежавалі наведванне студэнцкіх інтэрнатаў.

Пры гэтым Мінадукацыі не мае пакуль намеру ўводзіць каранцін.

Дзякуючы пропуску школы зрабіцца выдатнікам? Маем рэцэпт!

Раней паведамлялася, што частка студэнтаў Менскага дзяржаўнага лінгвістычнага ўніверсітэту з 20 сакавіка распачынае забастоўку з патрабаваннем да кіраўніцтва навучальнай установы ўвесці каранцін праз пандэмію COVID-2019.

З панядзелка 23 сакавіка моладзевыя актывісты таксама маюць намер абвясціць усеагульную забастоўку. Такія меры яны тлумачаць нежаданнем «падвяргаць рызыцы сябе і сваіх блізкіх праз нягнуткасць адміністрацыяў ВНУ».

Большасць еўрапейскіх універсітэтаў ужо перайшлі на дыстанцыйнае навучанне праз распаўсюд каронавірусу. На сённяшні дзень у Беларусі, у адрозненне ад суседніх краінаў, улады каранцін не ўводзілі. Навучальныя ўстановы працягваюць працаваць у штатным рэжыме.

Паводле апошніх звестак Мінздароўя, у Беларусі выяўлена 69 выпадкаў інфікавання на каронавірус.

Студэнты МДЛУ абвясцілі забастоўку: яны патрабуюць каранціну

СК belsat.eu

Hавiны